Durante e conferencia di prensa di Gobierno di Aruba dialuna mainta Minister di Finanza y Cultura Xiomara Maduro a papia riba e negociacionnan andando cu Gobierno di Hulanda. Den e conferencia aki el a sigura cu e problema entre Aruba y Hulanda no ta riba e aspecto di supervision.

Aruba ta bou control financiero no awo, pero for di aña 2015. “E supervision financiero no ta e topico di discusion. Nunca Aruba a bisa cu e no kier supervision financiero y e ta regla den Landsverordening Aruba financieel toezicht (LAft).Loke si ta berdad ta cu mester bay na adapta e LAft pa evita cu ta bay cay den un bashi ora cu esaki vence proximamente. E ley aki ta vence pa dia 31 di december awo.

Hopi no ta compronde e situacion pa cual e titular di Finanza a splica cu e LAft ta un ley di Aruba. Pero e rabo di porco ta krul den un articulo inclui den e ley aki cu ta duna Conseho di Minister di Reino cierto poder. E articulo ta bisa cu si Aruba no cumpli cu e normanan di ley, ta duna Conseho di Minister di Reino autoridad pa atende cu e asunto.

Lesa mas den TREMPAN.

Polis un rato pasa a informa cu recherche di San Nicolas a detene Neil Jansen, naci na Hulanda, di 45 aña di edad, pa maltrato contra e referee di fam Bedoya. El a dal e referee un boter despues di wega di futbol infantil U-13 entre La Fama y RCA diasabra ultimo. RCA a gana e wega y como cu La Fama a haya dos carchi cora, Jansen a opta pa bay regla cuenta despues di wega cu Bedoya.

Un intercambio di palabra basta pisa tabatin como consecuencia cu el a bay over na agresion, pa cual a dal e referee di tal forma cu mester a transport’e cu ambulance pa hospital. El a keda interna y a opera su wowo mesora. Ta teme cu e tin chens di perde su bista. Polis no a duna informacion con e detencion a tuma luga, pero a informa si cu el a keda cera pendiente mas investigacion.

Tabata den fin di siman durante un torneo di futbol na Savaneta cu e persona aki pa mustra su frustracion pa decision di un referee a dicidi di tira e oficial di wega aki cu un boter cu a causa un lesion serio na wowo di e referee. Despues di e sucedido, el a bandona e sitio. E team di futbol La Fama ainda no a informa nan posicion den e caso aki, sea nan ta distancia nan mes di e coach of si nan ta sostene.

Mester menciona cu, separa di ta coach di U-11 di La Fama, e mesun Neil Jansen sa coopera cu Arubaanse Voetbal Bond (AVB) tambe como fotografo y videografo.

Mientras tanto, SV La Fama tambe a informa cu nan lo bay tuma accion contra di e dirigente di nan organisacion.

Durante henter luna di october, Aruba ta celebra nos adultonan mayor. E iniciativa aki ta un refleho di e legado cu nos grandinan a construi y ta sigui construi pa nos, na beneficio di Aruba su futuro generacionnan. 

Hopi biaha ora nos ta papia di personanan 60+, e palabra “biehes” ta resalta, no tur ora den un manera positivo, pero manera nan ta bisa “bieu ta caminda!” Biehes ta un etapa di bida unda cu bo ta cosecha e fruto di cual bo a planta na jong. E amor, e cariño y e guia cu bo a duna bo sernan keri.

Dos aña pasa Gobierno di Aruba a establece ful un luna di adulto mayor, esaki despues unda pa prome biaha Aruba a conoce un ministerio di adulto mayor. E compromiso aki ta subraya e importancia di reconoce y sostene e necesidadnan unico di nos adultonan mayor.

Sinembargo, den e celebracion, Ministerio di Adulto Mayor ta reconoce e desafionan cu algun di nos adulto mayor ta enfrenta. Tin momentonan unda nan ta biba den circunstancianan lamentabel, faltando bishita, yamada, y recuerdo. Pa enfrenta esaki, den colaboracion cu Club Kibrahacha, a lansa Telefoon pa Adulto Mayor, yamando #125 no solamente ta brinda sosten, sino tambe un horea pa tende y asina nos adultonan mayor por sinti inclui den nos comunidad.

Nos grandinan nan inclusion den nos comunidad ta esencial pa e formacion di un sociedad cu ta duna adulto mayor e respet, cuido y apoyo cu nan mester den nan biehes. “Ta nos deber como comunidad pa garantisa nan siguridad, bienestar y brindanan e dignidad cu nan merece”, Minister Arends ta remarca.

Minister Arends tin un bista integral pa e cuido di adulto mayor, unda ta move for di un perspectiva puramente medico pa un cu ta enfatisa sosten social. Colaboracion den e tereno di cuido pa adulto mayor ta bira instrumental pa garantisa bienestar y calidad di bida pa e grupo creciente di adulto mayor. Esaki ta implica un esfuerso colectivo di profesionalnan di cuido medico, casnan di cuido, y e comunidad amplio, reconociendo cu e cuido di adulto mayor no ta solamente un asunto medico, sino un enfoke integral, social, y emocional.

Den nomber di Gobierno di Aruba, Minister Arends ta expresa gratitud na tur esunnan cu ta traha incansablemente pa sostene nos adultonan mayor directamente y ta sigui curasha actividadnan continuo dedica na nan durante henter e aña y no solamente durante luna di october. 

Dialuna atardi, despues di 3:45 pm, a sosode un accidente riba e caminda di Green Corridor. E accidente aki a tuma luga prome cu e rotonde di Mahuma. Un Toyota pickup marca Hilux dobel cabina color preto tabata bayendo direccion ariba na momento cu esaki tabata envolvi den e accidente aki.

Pa un motibo of otro chauffeur di e Toyota pickup marca Hilux dobel cabina a perde control riba caminda, ranca un pion, drenta mondi y dal contra di un palo di kwihi. Facebook live link https://24ora.news/3Pzqvv0

Na yegada di polis a solicita ambulance cu maximo urgencia debi cu un homber tabata grita di dolor y tambe un mucha tabata herida.

Ambulance a presenta n’e sitio y di biaha e paramediconan a bay atende cu e personanan herida. Forensys tambe a presenta n’e sitio pa asina traha rapport di e incidente pa seguro. Daño material riba e pickup tabata hopi.

Team di clinica di dialisis na HOH ta informa comunidad tocante un cambio den nan orario di servicio unda e enfoke ta pa mehora calidad y tambe servicio na tur pashent.

E adaptacion aki ta specialmente pa pashent cu ta ricibi e cuido di dialisis na HOH. E cambio aki lo yuda coordina e fluho di pashent miho unda lo cuminsa mas trempan pa asina pashent cu ta wordo atendi durante e di tercer shift no mester warda pa nan turno sino lo wordo yuda di biaha.  

E orario nobo di dialisis desde 1 di october ta:

·         dialuna- diaranson – diabierna di 7AM pa 10.50PM

·         diamars- diahuebs – diasabra di 7AM te cu 7PM 

Ta importante pa tene cuenta cu durante cada tratamento e mashin mester desinfecta cual ta tuma su debido tempo. Ademas, e orario nobo ta yuda e pashentnan caba e tratamento y haya miho asistencia di e nursenan cu lo por brinda miho atencion y dedicacion na nan pashentnan mirando cu no tin e siguiente pashent ta warda caba.

Otro motibo principal tras di e cambio ta cu e orario nobo ta elimina e parti unda pashentnan ta caba pareu cu nan tratamento y asina lo tin menos aglomeracion na e departamento cu ta bon pa e parti di higiena.

E team di dialisis ya caba a comparti e informacion aki individualmente cu cada pashent pa loke ta nan orario nobo. Cada colega na dialisis di HOH ta dedica pa haci nan maximo esfuerso pa e estadia di nan pashent durante dialisis ta mas placentero posibel.

Hospital semper t’ey y ta para firme den trece servicio y adaptacion unda cu ta necesario pa asina eleva e calidad di cuido pa comunidad di Aruba.