Partido PPA ta sostene aumento di salario minimo, pero ta insisti cu esaki mester sucede di manera responsabel, basa riba estudio economico y consulta cu sector comercial y sindical. Durante un conferencia di prensa, lider di PPA Otmar Oduber y lider di fraccion den Parlamento, Eduard Pieters a critica e manera con gobierno ta manehando e asunto, advertiendo cu sin medidanan pa reduci costo di bida y costo di haci negoshi, e aumento por tin consecuencia pa economia y poder di compra.

E aumento di salario minimo a genera discusion durante ultimo simannan. Recientemente Comerciante Uni Aruba (CUA) tambe a expresa nan preocupacion, señalando cu aumento salarial so no ta suficiente si gobierno no atende costo di bida halto, carga fiscal y costo di haci negoshi, pa evita cu e medida resulta den prijsnan mas halto pa consumidor.

Durante e conferencia di prensa, Oduber a enfatisa cu aumento di salario minimo ta forma parti di e programa electoral di PPA pa eleccion di 2024. Segun e, su partido tabata e unico cu a propone pa aumenta salario minimo gradualmente durante un periodo di dies aña, cu e meta di reduci e diferencia cu bestaansminimum, sin pone stabilidad economico y empresanan bao di presion excesivo.

Oduber a critica e diferencia di posicion entre AVP y FUTURO tocante e aumento di salario minimo. Segun e, mientras un parti di gobierno ta insisti riba implementacion, e otro ta pidi estudio y preparacion. PPA ta considera cu e desacuerdo aki ta refleha falta di coordinacion y di un strategia economico comun.

Un di e preocupacionnan principal di PPA ta e posible efecto cu un aumento di salario minimo por tin riba otro categorianan di trahado. Oduber a splica cu den un empresa, un aumento di salario pa empleadonan cu ta gana e minimo por provoca cu supervisornan y otro empleadonan tambe ta exigi un adaptacion di nan salario.

El a splica cu esaki por crea un efecto den diferente nivel di e structura salarial di un empresa. E consecuencia por ta cu e gastonan total di personal ta aumenta considerablemente, algo cu eventualmente por refleha den prijs di producto y servicio.

Oduber a señala cu e impacto tampoco ta limita na sector priva. Institucionnan subsidia, departamento y otro organisacionnan cu ta depende di financiamento publico tambe por enfrenta aumento di gasto salarial, cu consecuencianan pa presupuesto di pais.

P’esey, PPA ta considera necesario pa gobierno presenta un calculacion completo di e efecto financiero y economico di e medida, incluyendo e posible impacto riba empresanan, consumidor y finanzas publico.

Oduber a enfatisa cu e obhetivo no mester ta solamente pa aumenta salario minimo, sino pa fortalece poder di compra. Segun e, si prijs di producto, servicio y vivienda sigui aumenta, e beneficio salarial por desaparece rapidamente. P’esey, PPA ta insisti riba medidanan pa reduci costo di bida.

Un di e propuestanan principal di PPA ta revisa e sistema di impuesto indirecto, particularmente BBO. Oduber a argumenta cu e impuesto aki ta contribui na costo di haci negoshi y cu su efecto por acumula den diferente etapa di comercialisacion di producto y servicio.

E partido ta boga pa considera un sistema alternativo, manera BTW, cu segun Oduber por contribui na un structura fiscal diferente y reduci e presion cu e actual sistema ta eherce riba economia.

Oduber a señala cu Aruba ta depende casi completamente di importacion di producto. P’esey, cambionan den prijs internacional, costo di transporte y otro gastonan externo ta afecta mercado local. Segun e, e efecto aki por bira mas grandi ora impuesto y otro gastonan local ser agrega.

E lider politico tambe a cuestiona e manera cu gobierno ta beneficia di entrada adicional di impuesto ora prijsnan internacional ta aumenta. El a menciona como ehempel e aumento di costo di container, combustible y producto di alimento, cu segun su argumento ta genera mas entrada fiscal sin necesariamente representa un mehoracion economico pa consumidor.

Den e contexto aki, Oduber a propone pa gobierno considera medidanan temporal pa limita e efecto di aumento internacional, incluyendo adaptacion di cierto cargonan of impuesto cu ta relaciona cu importacion.

Otro aspecto cu PPA ta considera importante ta transporte publico. Segun Oduber, transporte ta representa un gasto considerable den presupuesto mensual di hopi famia, particularmente esnan cu mester biaha tur dia di nan cas pa nan lugar di trabao.

El a menciona cu algun trahado por gasta entre 300 y 450 florin pa luna riba transporte. Segun e, un sistema di transporte publico mas eficiente y accesibel por reduci e gasto aki y aumenta poder di compra, sin necesidad di depende exclusivamente di aumento salarial.

Oduber a argumenta cu inversion den Arubus y un servicio publico mas confiabel por representa un forma directo di yuda trahadonan cu entrada limita. E medida aki, segun PPA, por contribui tambe na reduccion di e bestaansminimum.

Durante e conferencia di prensa, Oduber a referi tambe na e situacion di pensionadonan. El a cuestiona e efecto real di e aumento di 500 florin cu gobierno a implementa, argumentando cu e aumento continuo di costo di bida a reduci considerablemente e poder di compra adicional cu e pensionadonan a ricibi.

Segun Oduber, esaki ta ilustra pakico medidanan financiero no por ser evalua solamente segun e cantidad di placa cu un persona ta ricibi, sino tambe segun e gastonan cu e persona mester cubri diariamente.

PPA a presenta ademas su propuesta pa aumenta productividad laboral como parti di un strategia economico mas amplio. Den su programa electoral, e partido a inclui adaptacion di legislacion laboral y medidanan pa mehora eficiencia den empresanan.

Otro propuesta ta introduccion di un beneficio economico laboral, mediante cual empresanan cu registra ganashi y cu tin acuerdo cu nan empleadonan por comparti un parti di e ganashi cu trahadonan. Segun e plan presenta pa PPA, e cantidad comparti lo por bin na remarca pa deduccion fiscal bao di cierto condicionnan.

Oduber a indica cu e tipo di iniciativa aki por contribui na un miho distribucion di beneficio economico, mientras ta stimula productividad y colaboracion entre dunador di trabao y empleado.

Di su banda, parlamentario Eduard Pieters a expresa preocupacion tocante e proceso di consulta cu gobierno a sigui pa discuti e aumento di salario minimo.

Pieters a indica cu durante un reunion di comision parlamentario cu representantenan di sector comercial, el a haci pregunta tocante e involucramento di e gremio den e proceso di preparacion.

Segun Pieters, e informacion cu el a ricibi ta indica cu e representantenan comercial no a participa den un dialogo completo manera gobierno a presenta. El a splica cu, segun e informacion comparti durante e reunion, e sector a ricibi un presentacion y oportunidad pa haci pregunta, pero no a participa den elaboracion conhunto di e agenda y e plan.

El a argumenta cu un dialogo efectivo mester permiti tur parti presenta nan preocupacion, proposicion y recomendacionnan prome cu un decision importante ser tuma.

Pieters a cuestiona tambe e falta di informacion disponible tocante e medidanan complementario cu gobierno ta contempla pa compaña e aumento salarial.

El a referi na un rapport di Economische Bureau Amsterdam cu, segun e, gobierno a menciona den e discusion, pero cu ainda no a ser presenta na Parlamento di Aruba.

Pieters a enfatisa cu sin acceso na e informacion aki ta dificil pa parlamentarionan evalua e fundamentacion economico di e propuesta y su posible consecuencianan.

E parlamentario a enfatisa cu PPA ta completamente na fabor di mehora salario minimo, pero ta considera indispensable pa gobierno presenta un plan cla, transparente y prepara den consulta cu e sectornan involucra.

El a menciona tambe prijs di gasolin manera otro factor cu ta afecta poder di compra. El a compara e situacion di Aruba cu Corsou, argumentando cu gobierno local por considera reduccion di accijns of un limite na aumento di prijs pa brinda alivio na consumidor.

Segun Pieters, e resultado positivo di economia di Aruba y e entrada adicional di gobierno mester crea espacio pa evalua medidanan cu por reduci e carga financiero riba famianan.

Oduber y Pieters a reafirma cu PPA ta sostene aumento di salario minimo, pero ta considera cu e medida mester forma parti di un politica economico mas amplio, cu ta inclui reduccion di costo di bida y costo di haci negoshi, mehoracion di transporte publico, reforma fiscal y aumento di productividad laboral. Segun e partido, e prioridad mester ta pa fortalece poder di compra di trahadonan y famianan na Aruba, evitando cu e beneficio di un salario mas halto ta ser reduci pa aumento di prijs y otro gasto.

Un victoria aplastante pa partido Democrata y un igual derota pa presidente Trump y su partido Republicano tabatin henter mundo den suspenso. E consecuencianan di e resultado electoral aki, cu un mayoria fuerte Democratico den ambos camara di Congreso, sigur lo significa influencia riba e limite di operacion di gobierno di Trump. Pero mester tuma na cuenta cu e poder ehecutivo grandi cu cualkier presidente Mericano tin por haci cu Trump lo purba continua su maneho, cu a resulta den un desastre pa su pais, cu e resultado electoral aki como consecuencia.

Talvez en general tabata anticipa un derota electoral, pero no di e magnitud cu a resulta finalmente. E señalnan cu un reaccion di e electorado lo a bin tabat’ey y nan tabata simplemente demasiado: un guera di tarifa di importacion cu practicamente henter mundo, specialmente cu e paisnan aliado di Merca, cu e ciudadano mester a paga den aumento di prijs. Mientras tanto den casi dos aña no a mira nada di e ‘re-industrializacion’ cu lo mester a tuma lugar, a consecuencia di e supuesto atraccion di produccion na e pais mes pa cual e impuestonan lo a crea un base.

Despues a bin e guera cu Iran, mientras Trump a haci e promesa cu e ta para tur ‘guera interminable’ manera otronan a hiba. Tambe su promesa di persecucion y deportacion di migrante a bira realidad, loke principalmente a afecta e comunidad Latino, di cual un parti a apoya Trump na 2024, den e creencia cu lo ta e ‘otro Latinonan’ e lo expulsa. Loke nan a haya tabata e excesonan di persecucion y deportacion cu ICE tabata haci den nan comunidad, loke a termina pa gran parti nan lealtad na Trump.

E guera cu Iran a resulta den un limitacion mundial di disponibilidad di crudo y producto petrolero, cu te awor a keda e interogante grandi pa resolve. Esaki a bira e dolor di cabez mayor pa economia Mericano tambe, causando inflacion den practicamente tur sector economico. Y mientras e pais a keda confronta cu e consecuencianan desastroso di su maneho, e nepotismo y corupcion descarado di Trump, su famia y grupo intimo tabata tuma lugar abierta y publicamente pa henter mundo mira.

Mirando tur esaki, no ta nada straño cu a bin un reaccion electoral. Pero, e comentarionan den medionan afilia na partido Democrata, cu lo por ‘normaliza’ e pais den e proximo dos añanan, ta realistico? Tin hopi argumento cu ta mustra den otro direccion. Por ehemplo, pasobra e ‘fenomeno Trump’ no ta algo isola, sino basa riba un fundamento di conservatismo ultrafanatico, cu raiz den e pensamento di e parti di e poblacion di raza blanco, cu ta nan ta e berdadero herederonan di e republica, cu a celebra 250 aña di existencia e aña aki. Si acaso Trump acepta cu na 2028 su reinado ta termina, loke no ta garantiza ainda, no lo bin un fin na e descontento bao di e grupo na cual e ta pertenece y cu lo keda un problema pa varios decada ainda. Un bon indicacion di e posible desaroyo negativo aki por mira den e actitud di e aliadonan Europeo y Canada, pero tambe otro manera Australia, Hapon y Sur Corea. Tur ta realiza bon cla cu hasta un gobierno Democrata na 2028 no ta un garantia pa bolbe na e situacion ‘normal’ di dos aña pasa. Esaki tin su banda positivo, pasobra Europa y Canada sigur a cuminza construi un cooperacion firme, sin envolve Estadonan Uni, den entre otro defensa, telecomunicacion y propio sistema digital, incluyendo un propio maneho pa Inteligencia Artificial (AI), pa no keda depende di e gigantenan digital Mericano. Igualmente tin desaroyo den asunto monetario tambe, creando sistemanan di pago internacional, cu no ta depende di Mastercard y Visa. E sistema di pago digital Europeo, Wero, ta operando caba dentro di e paisnan Europeo, pero lo mester bay opera globalmente.

Tur e desaroyonan aki no ta significa cu no tin relacion economico cu Merca mas, pero e tradicion di check promer cu Washington pa wak si nan ta aproba, no t’ey mas. Por ta cu algun dia tanto Canada como Union Europeo por gradici Trump pa su actitud agresivo y hasta grosero, cu a haci nan realiza cu mundo mester ta organiza di otro forma.

Sin embargo, loke ta importante awor mes ta e pregunta kico Trump ta bay haci, tanto internamente como na nivel internacional. E problema principal ta keda e conflicto cu Iran, cu di ningun manera por resolve cu mas agresion militar, a menos cu inicia un invasion di cienmiles di militar, cu Merca no tin. Ta casi imposible pa resolve e asunto sin cu gobierno di Trump accede por lo menos na cierto exigencia di Iran, pa por logra liber acceso pa trafico maritimo na Hormuz. E bon noticia ta cu Trump lo tin awor, banda di presion internacional, tambe presion den Congreso pa termina e guera na mesa di negociacion. Pero tur esey no ta garantia, pasobra Trump ainda tin gobierno ehecutivo den su man. Legislacion di banda Democrata por bay termina den guera eterno di veto presidencial, mientras Trump ta intensifica su gobierno via decreto ehecutivo. E situacion aki por tin riesgo grandi pa partido Democrata: nan por pasa ley den Congreso cu por keda bloquea pa Trump, y si finalmente nan no por efectivamente resolve e problemanan principal cu e electorado ta mira: inflacion, principalmente den alimento y combustible, escasez di vivienda, seguro medico pagable, nan tambe por ta den problema electoral na 2028. Gobierno y Congreso ta condena na negocia un salida conhunto…

E peticion di MEP pa un reunion publico tocante e expresion nan di Princess Beatrix riba Betico Croes ta un asunto cu por merece aclaracion. E agenda oficial di Parlamento ta confirma cu e tema a wordo programa pa 4 di november 2026. Historia di Aruba merece respet y un tratamento serio. (statenvanaruba.ibabs.org)

Mientras tanto, e habitante local ta enfrenta un presion creciente den su bida diario: paga huur, cumpra cuminda, cubri awa y coriente, mantene transporte pa bay trabou y percura pa e muchanan. Cada gasto adicional ta laga menos espacio pa spaar, atende un emergencia of construi algo pa futuro. Pa un famia cu ta calcula cada florin, e preocupacion ta con pa yega fin di luna sin drenta mas den debe.

Ta den e realidad aki cu MEP, como e partido di oposicion mas grandi, mester mustra cu nan ta compronde loke ta biba den comunidad. Nan papel ta inclui controla gobierno y presenta alternativanan concreto cu pueblo por evalua. E pregunta ta cua medidanan nan ta propone pa alivia costo di bida, cuanto nan lo costa y con nan por wordo financia.

MEP a dedica atencion na e biahe di minister Gerlien Croes den un jet priva, exigiendo claridad tocante pago y documentacion. Nan a sigui e asunto te na un apelacion na corte. Segun publicacion, nan reclamonan ta suheto na evaluacion di corte.

Exigi transparencia ta parti di nan responsabilidad como oposicion. Pero e mesun energia, persistencia y preparacion mester ta visibel den nan trabou riba costo di bida. E cuestion di Gerlien Croes ta ricibi atencion constante; e alternativa economico di MEP mester ta por lo menos mes cla y reconocibel pa pueblo.

Den e debate aki, e alternativa ey ainda no ta suficientemente cla. Papia di poder di compra mester wordo sigui pa propuestanan cu ta splica con nan kier reduci gastonan esencial, amplia acceso na vivienda pagabel y stimula competencia. Pueblo mester por mira cua cambio nan ta busca, cua paso parlamentario nan ta dispuesto pa tuma y con nan lo midi resultado.

Como oposicion, nan no ta ehecuta e maneho di gobierno. E responsabilidad pa decisionnan y ehecucion ta keda cu gobierno actual. Pero MEP tin instrumentonan pa actua: presenta iniciativa di ley, trece mocion, exigi informacion, propone cambio y controla si promesanan ta wordo cumpli. Nan credibilidad como alternativa ta depende tambe di con nan ta uza e instrumentonan ey.

E urgencia cu nan ta mustra pa defende e memoria di Betico y cuestiona e biahe di Gerlien Croes mester ta visibel tambe den nan trabou pa atende e preocupacionnan di pueblo awe. Un partido por atende tur e asuntonan aki pareu. E habitante local tin derecho di spera cu su dificultad pa cubri gastonan basico ta ricibi atencion politico sosteni.

Ora e posicion riba un asunto historico of e conducta di un minister ta cla, pero e alternativa economico ta keda dificil pa identifica, esaki por crea e impresion cu e oposicion ta leu di e realidad diario di pueblo. Pa e famia cu ta sinti e presion, e respuesta mester inclui propuesta, calculo, prioridad y siguimento.

Si MEP tin plannan concreto caba, nan mester presenta y comunica nan di un manera cu pueblo por lesa, compara y evalua. Como e oposicion mas grandi, nan mester mustra con nan lo haci cos diferente y pakico nan alternativa lo mehora bida di e habitante local.

Un representante di ATIA, hunto cu representantenan di dos otro organisacionnan empresarial, a ricibi un invitacion pa participa den un dialogo social riba 8 di april ultimo. Despues di e prome reunion, a keda acorda cu e sector empresarial, sindicatonan laboral y Gobierno di Aruba lo presenta cada un nan topiconan pa e agenda y lo establece protocolnan cla pa regula e proceso di dialogo. Esaki tabata un consideracion esencial pa facilita un discusion constructivo y traha hunto na posibel solucionnan.

Sinembargo, despues di e di dos reunion, a bira evidente cu ningun di e topiconan presenta pa e organisacionnan empresarial tabata wordo trata. Ademas, e Prome Minister no a acepta e protocolnan presenta door di e organisacionnan empresarial ni tampoco e sindicatonan laboral.

E establecimento di protocolnan cla ta particularmente importante, como cu anteriormente procesonan di consulta a demostra un tendencia di gobierno cu ta adopta selectivamente cierto resultadonan, mientras ta laga otronan afo. Durante e di dos reunion, e Prome Minister a indica cu e no lo acepta e protocolnan presenta y a declara cu e legislacion por wordo implementa sin e participacion ni aporte di e sector empresarial.

Como resultado, ningun dialogo substancial a tuma lugar cu e participantenan, ni tampoco a comparti estudionan, analisisnan of informacion di sosten cu ta forma e base pa e maneho di e propuesta. Pa e motibonan subraya, ATIA ta lamenta e declaracionnan publico di e Prome Minister cu ta sugeri cu e asunto ya a wordo studia y debati ampliamente.

ATIA semper a keda disponibel pa dialogonan constructivo. Sinembargo, un consulta significativo ta rekeri un participacion genuino di tur stakeholder, y no un proceso den cual e resultado practicamente ya a keda determina prome cu e discusionnan a cuminsa.

ATIA ta apoya medidanan cu ta fortalece e poder di compra y mehora e bienestar di trahadornan. Na mes momento, decisionnan di e forma aki mester ta basa riba informacion transparente, completo y analisis profundo. Lamentablemente, durante tur e reunionnan aki, no a presenta ni un estudio, informe of informacion di sosten na e participantenan.

E di cinco audiencia den e caso penal contra Chania Fernandes Pedra, sospechoso di e accidente fatal di trafico riba L.G. Smith Boulevard cu a cobra bida di dos persona, a conoce varios momento di tension y emocion den sala di Corte. Despues di aproximadamente 10 luna den detencion, e sospechoso a presenta un biaha sin abogado, situacion cu a provoca preocupacion y frustracion cerca e hues. A pesar cu Corte a dicidi pa continua cu tratamento di e caso, un peticion pa cambia hues a obliga pa suspende e proceso.

E audiencia di ayera 4 di november tabata destina pa tratamento di e caso relaciona cu e accidente fatal cu a sacudi comunidad di Aruba. Durante e proceso, fiscal di Ministerio Publico (OM) a presenta e acusacionnan contra Fernandes Pedra, mientras cu Corte a trata e peticionnan di e sospechoso pa pospone e caso y su detencion.

Un di e acusacionnan ta relaciona cu stuur bao di influencia di alcohol. Durante e audiencia, fiscal a pidi un modificacion den e acusacion, specificamente pa cambia e cantidad di alcohol menciona, cu anteriormente tabata indica mas di 300, pa un cantidad bao di 300. Hues a acepta e modificacion solicita.

Sinembargo, e punto principal di discusion durante e prome parti di e audiencia tabata e ausencia di un abogado pa representa e sospechoso. Hues a expresa su decepcion cu, despues di cinco audiencia y aproximadamente 10 luna di detencion, ainda no a logra establece representacion legal pa Fernandes Pedra.

Prome cu hues a tuma un decision riba e peticion pa pospone tratamento di e caso, hues a presenta un resumen detaya di e esfuersonan haci durante e proceso pa busca un abogado. El a splica cu Corte tin un proces-verbaal di e audiencianan anterior, den cual ta registra e desaroyo di e caso y e diferente situacionnan cu a surgi.

Segun e splicacion di hues, durante e prome audiencia pro forma, Fernandes Pedra tabatin dos abogado cu su famia tabata paga. Despues, un di tres abogado a ser agrega na su defensa. Sinembargo, e situacion a cambia ora cu a pidi pa abogado Hulandes Moszkowicz representa e sospechoso.

Hof a rechasa e peticion, debi cu e abogado no tabata inscribi cerca Hof. Prome cu e decision aki, e dos abogadonan original a retira for di e caso. Despues cu Hof a rechasa e peticion relaciona cu Moszkowicz, e di tres abogado tambe a retira.

Durante e di dos audiencia, Moszkowicz a presenta na Aruba y a indica cu lo entrega un peticion nobo na Hof pa haya autorisacion pa representa Fernandes Pedra. Sinembargo, segun e informacion cu hues a presenta, e peticion aki nunca a ser entrega.

Despues di esaki, Fernandes Pedra a informa OM cu su famia sospechoso no tabatin mas posibilidad financiero pa sigui paga un abogado particular.

Como consecuencia, OM a acerca Orde van Advocaten na Aruba pa investiga si tabatin abogado dispuesto pa asumi e defensa di Fernandes Pedra, pero no a ricibi ningun reaccion.

Riba instruccion di Corte, OM a extende e buskeda na Corsou, caminda dos abogado a mustra disponibilidad pa considera e caso.

Inicialmente, a solicita pa abogado Zahedi asumi e defensa bao di e sistema pro deo, caminda gobierno ta cubri e gastonan di asistencia legal. E peticion a ser aproba, pero despues a resulta cu tabatin un malentendido, pasobra e abogado tabata bao di impresion cu e famia lo paga su servicio. Como consecuencia, el a retira for di e caso.

Durante e di cuatro audiencia, otro abogado di Corsou, Dickens, a mustra disponibilidad pa representa Fernandes Pedra. Ya tabata determina cu e caso no lo ser trata e dia ey, pa duna e abogado suficiente tempo pa studia e dossier.

Sinembargo, durante e audiencia, caminda Dickens a participa via video call, Fernandes Pedra a rechasa su representacion.

Despues di e situacion aki, a acerca Orde van Advocaten na Sint Maarten. Cinco abogado a mustra interes pa examina e dossier, di cual uno a establece contacto directo cu e sospechoso. Pero na final, e abogado aki tambe a retira.

Fernandes Pedra a declara durante e audiencia cu, segun su impresion, e combersacion cu e abogado tabata positivo, pero cu despues e abogado a indica cu no tabata dispuesto pa traha pro deo.

Mientras tanto, abogado Zahedi di Corsou a manifesta un biaha mas su disponibilidad pa asumi e defensa pro deo, bao di condicion cu su gastonan di estadia na Aruba lo ser cubri. Ademas, el a indica cu e kier trata directamente cu e sospechoso y no cu su famia.

Un encuentro entre e abogado y Fernandes Pedra a tuma lugar, pero esaki tampoco no a resulta den un acuerdo. Segun e sospechoso, e abogado a comporta su mes di manera irespetuoso durante e combersacion y pa e motibo ey el a rechasa e abogado aki tambe.

Hues a expresa su frustracion cu e situacion, cuestionando con ta posible cu regularmente abogadonan ta asumi casonan pro deo, pero cu den e caso aki ainda no a logra establece un defensa legal.

Durante su reaccion riba e peticion pa pospone e caso, fiscal di OM a reconoce cu un sospechoso tin derecho na asistencia legal efectivo y cu un abogado mester haya suficiente tempo pa prepara su defensa.

Sinembargo, fiscal a enfatisa cu mester tene cuenta tambe cu e famianan di e victimanan, cu ta sperando pa un conclusion di un proceso doloroso, y ademas comunidad di Aruba tambe tin interes den un conclusion di e caso.

Fiscal a indica cu e derecho na un proceso husto ta fundamental, pero cu esaki mester ser evalua den relacion cu e circunstancianan di e caso. Segun fiscal, despues di cinco audiencia a yega e momento pa continua cu e tratamento di e caso.

Despues di un deliberacion, hues a anuncia cu e peticion pa pospone e tratamento no a ser acepta. El a reconoce cu e decision tabata dificil, considerando e derechonan di e sospechoso y e interesnan di tur partido involucra.

Hues a señala cu durante e proceso varios abogado a mustra disponibilidad pa representa Fernandes Pedra, pero cu diferente posibilidad no a resulta den un acuerdo. Ademas, no tabatin perspectiva concreto riba un solucion nobo pa su representacion legal.

E decision a provoca un reaccion emocional fuerte cerca e sospechoso. Fernandes Pedra a expresa cu no e tabata di acuerdo y a lanta for di su stoel y a purba bandona sala di Corte como señal di protesta. Personal di seguridad a interveni, despues di locual el a bolbe sinta.

Mientras cu e sospechoso tabata sigui expresa su desacuerdo, el a cuminsa yora. Hues a dicidi pa suspende e audiencia temporalmente. Ora cu e audiencia a reanuda, Fernandes Pedra inicialmente no tabata dispuesto pa drenta sala. Despues di un rato, a logra convence pa e regresa.

Na momento cu hues a cuminsa trata e hechonan relaciona cu e accidente, Fernandes Pedra a lanta di nobo, visiblemente emocional. Yorando, el a dirigi su mes na e famianan di e victimanan y a pidi nan disculpa. El a indica cu kier keda presente durante e tratamento, pero cu emocionalmente no tabata capaz pa haci esaki.

Hues a splica cu e decision pa permanece den sala tabata na e sospechoso mes, pero cu e tratamento lo continua cu of sin dje. No obstante, el a enfatisa cu su preferencia tabata pa Fernandes Pedra keda presente.

E sospechoso a bandona sala y Corte a continua cu e tratamento.

Durante e audiencia, hues a presenta un compilacion di grabacionnan di camara di seguridad situa na diferente punto riba L.G. Smith Boulevard. E imagennan a mustra e ruta di e vehiculo relaciona cu e caso caminda por a mira e vehiculo ta core na velocidad extremadamente halto, prome cu e accidente fatal.

Mientras cu e tratamento tabata continua, Fernandes Pedra a regresa den sala. Sinembargo, poco despues hues a ricibi un documento nobo, cu a cambia e curso di e audiencia.

E documento tabata un “wrakingsverzoek”, un peticion formal pa reemplasa e hues encarga cu e caso, firma door di e sospechoso.

Un peticion di e tipo aki ta ser presenta ora cu un partido ta cuestiona e imparcialidad di un hues y ta considera cu tin motibo pa duda si e caso lo ser trata di manera independiente y husto. E peticion no ta nifica automaticamente cu e hues a actua incorectamente.

Hues a tabata sorprendi cu e documento y a puntra Fernandes Pedra si e tabata na altura di e peticion. E sospechoso a confirma cu si, pero ora cu hues a solicita e motibo, el a nenga di duna un splicacion.

Como consecuencia, hues a suspende e audiencia un biaha mas pa evalua con e proceso mester continua. Despues di un deliberacion, hues a anuncia cu no tabata posible pa sigui cu e tratamento mientras e peticion pa su reemplaso ta pendiente.

El a informa cu e “wrakingskamer”, e instancia hudicial encarga cu evaluacion di e tipo di peticion aki, lo trata e asunto diabierna. E instancia lo determina si e hues actual por continua cu e caso of si ta necesario pa asigna otro hues.

Finalmente, hues a informa cu e tratamento di e caso ta programa pa continua dia 18 di november, independientemente si ta e mesun hues of un otro hues cu lo ta encarga cu e proceso.