Minister di Finanzas, Asunto Economico y Sector Primario, mr. Geoffrey B. Wever, a reuni awe mainta, 11 di november 2026, cu e Grupo Directivo Nacional pa Preveni y Combati Labamento di Placa y Financiamento di Terorismo (National AML/CFT Steering Group). E reunion a centra riba e cooperacion y coordinacion nacional necesario pa actualisa e documento cu ta contene e resultadonan di e Evaluacion Nacional di Riesgo (NRA) di 2020.

E evaluacion di 2020 lo forma e base pa e actualisacion, pa asina haci bon uzo di e structura y e instrumento uza den e proceso cu Aruba a pasa aden entre 2018 y 2020. E enfoke ta pa conserva e resultadonan cu ainda ta valido, actualisa loke a cambia y corigi e aspectonan cu mester mehoracion. Alabes, lo efectua un analisis integral di e dato y informacion nobo, cu e meta di publica un documento actualisa di Evaluacion Nacional di Riesgo na 2028. E meta ta pa logra un comprension mas profundo di e riesgonan cu Aruba ta enfrenta y di e manera cu nan ta relaciona cu otro. Esaki lo yuda determina cua medidanan ta mas efectivo y caminda mester dirigi e recursonan disponibel. E resultado mester ta un base solido pa establece prioridadnan nacional y tuma accion concreto contra criminalidad financiero.

Gobierno di Aruba a institui un Secretariado Nacional bao di liderazgo di e Unidad di Inteligencia Financiero (FIU-Aruba), cu ta asisti Gobierno cu e coordinacion nacional riba e tereno aki. Minister Wever a accentua cu e exito di e proceso pa elabora un documento actualisa di Evaluacion Nacional di Riesgo ta depende di datos y informacion confiabel y di cooperacion activo di, entre otro, Ministerio Publico, FIU-Aruba, Banco Central di Aruba, Cuerpo Policial, Cuerpo di Aduana, Departamento di Impuesto, Departamento di Asunto Economico, Departamento di Legislacion, Camara di Comercio, Freezone, NCTVI y representantenan di e sector priva. Ta trata di un responsabilidad comparti, cu ta rekeri compromiso di tur esnan envolvi.

E plan ta pa reevalua e riesgonan riba tereno di labamento di placa den e 16 sectornan. Pa haci esaki di un manera eficiente, lo uza cuestionarionan pa compila dato y informacion. Varios grupo di trabou lo reuni pa revisa y valida e informacion recopila, cu e meta di identifica y categorisa e nivel di riesgo di cada sector y, finalmente, determina e riesgo general pa Aruba. E documento lo contene tambe recomendacionnan y un plan di accion. E intencion ta pa tur esnan cu tin un rol den salvaguardia di e integridad di nos sistema financiero uza e Evaluacion Nacional di Riesgo como base pa formula nan mesun enfoke basa riba riesgo. E proceso lo sigui uza e instrumento di evaluacion di Banco Mundial.

Segun e plan presenta, e recopilacion y analisis di informacion lo continua den 2027, sigui pa validacion y finalisacion den 2028. E meta ta pa publica e evaluacion actualisa den e tercer trimester di 2028, suheto na entrega di informacion na tempo, e pasonan di validacion y aprobacion formal.

Minister Wever ta expresa su gradicimento na DWJZ, cu durante varios aña a carga e responsabilidad pa e secretariado y coordinacion nacional. En particular, e ta gradici Sr. George Croes y Sr. Marcel ’t Mannetje pa nan dedicacion y contribucion valioso durante e añanan, cu a forma parti importante di e esfuersonan nacional cu a contribui na e resultado positivo di Aruba durante e evaluacion mutuo di CFATF na 2021. Tambe, Minister Wever ta extende su agradecimento na FIU-Aruba pa su disponibilidad y compromiso pa asumi e responsabilidad adicional di secretariado y coordinacion nacional, y ta enfatisa e importancia di un cooperacion continuo entre tur e organisacionnan representa den e Stuurgroep.

Cu e trayecto aki, Aruba ta traha pa fortifica e integridad di su sistema financiero y economico. Cooperacion entre Gobierno, supervisornan, instancianan encarga cu investigacion y aplicacion di ley, y e sector priva ta esencial pa preveni y combati criminalidad financiero y pa prepara Aruba pa e proximo ronda di evaluacion mutuo internacional.

Si e area cora sigui crece, sociedad lo mester contesta un pregunta cu nunca den historia nos a mester contesta: kico ta pasa ora un parti grandi di poblacion no mester traha mas pa e economia produci suficiente? E rikesa cu AI ta genera tin di bay un caminda. Si e ta bay solamente na e doñonan di e modelonan y e centronan di data, nos ta bay haya un desigualdad nunca bisto.

Varios herment ta riba mesa:

Entrada Basico Universal (UBI): un pago regular, sin condicion, pa cada ciudadano. Finlandia a test esaki den 2017–2018 cu 2.000 desempleado cu tabata ricibi €560 pa luna: bienestar y confiansa a mehora, mientras cu e efecto riba empleo tabata chikito.

Dividendo Universal di AI / Accion Basico Universal: en bes di duna placa so, duna cada ciudadano un parti di e propiedad. Alaska ta haci esaki desde 1982 cu su Permanent Fund, financia cu entrada di petroleo; na october 2026 cada residente eligibel a ricibi $1.200. Sam Altman, CEO di OpenAI, a propone den 2021 un “American Equity Fund” cu ta cobra tur aña 2,5% di e balor di mercado di companianan grandi y di tera, paga den accion, pa reparti entre tur ciudadano. Un otro idea ta “universal basic compute”: cada ciudadano un porcion di capacidad di AI cu e por usa, bende of comparti.

Belasting riba automatisacion y ganashi excepcional: e “robot tax” cu Bill Gates a propone den 2017, of e “Windfall Clause” — un compromiso di companianan di AI pa reparti un parti di ganashi extremo cu sociedad.

Servicio Basico Universal: en bes di placa, garantisa salud, educacion, transporte publico y internet gratis of hopi barata.

Semana laboral mas cortico: reparti e trabao cu ta keda entre mas hende.

Pa un isla chikito manera Aruba, cu no ta cas di ningun compania grandi di AI, e pregunta ta mas complica: nos no por cobra belasting na nan sede. Nos opcionnan realistico ta: un fondo nacional di futuro cu ta inverti sistematicamente den e economia global di AI — manera Noruega a haci cu su rikesa di petroleo — belasting riba servicionan digital cu ta wordo consumi localmente, y un alfabetisacion masal di AI pa nos pueblo ta doño di e herment, en bes di victima di dje.

Humanidad den un mundo sin obligacion di traha

Pa siglonan, trabao no tabata solamente un fuente di entrada den e mundo occidental — e tabata un identidad. Max Weber a describi con e etica protestant a transforma trabao den un yamada moral. Te awe, e prome pregunta cu nos ta haci un desconoci ta: “Kico bo ta haci?” Nos ta midi nos balor, nos dignidad y nos lugar den sociedad na nos trabao.

Na 1930, economista John Maynard Keynes a predici cu e nietonan di su generacion lo traha solamente 15 ora pa siman, y a adverti cu e berdadero problema permanente di humanidad lo ta con pa usa e libertad ey pa biba sabi, agradabel y bon. Aristoteles a bisa casi 2.400 aña pasa cu nos ta traha pa por tin scholē — tempo liber — y cu e tempo liber ey ta e meta di bida, no e trabao. Hannah Arendt a distingui entre labor (loke nos ta haci pa sobrevivi), work (loke nos ta crea cu ta dura) y action (nos participacion den bida publico). Si AI tuma over e prome, e otro dosnan ta keda completamente den nos man.

Viktor Frankl, cu a sobrevivi e campo di concentracion, a siña nos cu sentido den bida ta bin di tres fuente: loke nos ta crea, e hendenan cu nos ta stima, y e actitud cu nos ta scoge dilanti sufrimento. Ningun di e tres aki ta depende di un salario.

Na Aruba nos sa kico esaki kier men. Nos identidad semper a wordo forma no solamente pa nos trabao, pero pa nos famia, nos bario, nos musica y Carnaval, nos fe, nos pisca riba lama, nos lenga Papiamento. E reto di e era di AI no ta pa haya un otro trabao pa yena e bashi; e reto ta pa recorda kico semper tabata importante. Un mundo sin obligacion di traha no ta un mundo sin proposito. E ta un mundo unda, pa prome biaha den historia, cada hende lo por haci e pregunta cu antes solamente e privilegiadonan por a haci: no “con mi ta bay sobrevivi?”, sino “pakico mi ta biba?”

Gobierno Hulandes ta prepara Economisch Groeiplatform Carib (EGC), un iniciativa pa stimula crecemento economico y innovacion na Aruba y e otro cinco islanan Caribense den Reino. Deloitte Dutch Caribbean a ricibi encargo pa elabora un plan di accion. Minister Heleen Herbert a discuti e iniciativa durante su bishita na Aruba, Corsou y Boneiro na comienso di november. Sinembargo, ainda no tin fondo reserva pa establece e plataforma.

E informacion ta aparece den un documento oficial presenta na Tweede Kamer di Hulanda, cu ta contene contestanan por escrito na preguntanan haci durante tratamento di presupuesto di Ministerio di Asunto Economico, dia 14 di october 2026.

Den e documento, minister Herbert ta duna mas claridad tocante preparacion di Economisch Groeiplatform Carib, un iniciativa menciona den e acuerdo di coalicion di gobierno Hulandes. E intencion ta pa stimula desaroyo economico y innovacion den e seis islanan Caribense di Reino, incluyendo Aruba.

E propuesta ta parti di un vision pa identifica oportunidadnan economico den Caribe y investiga con cooperacion entre e islanan por contribui na un desaroyo mas fuerte. No obstante, e informacion presenta ta mustra cu e proyecto ainda ta den un fase inicial y cu diferente aspecto importante mester ser defini prome cu e plataforma por cuminsa funciona.

Segun e minister, na comienso di october 2026 Deloitte Dutch Caribbean a cuminsa cu un encargo di Ministerio Hulandes di Asunto Economico y Clima pa prepara un plan di accion relaciona cu establecimento di EGC.

E trabao aki mester contribui na determina con e plataforma por ser organisa, cua funcion e por cumpli y con e por conecta cu iniciativanan economico cu ya ta existi den e islanan.

Un aspecto importante di e propuesta ta cu e plataforma mester ser desaroya pa e islanan y cu participacion di e islanan mes. E punto di salida aki ta indica cu e proceso preparatorio mester considera e necesidad y circumstancianan local, en bes di introduci un structura cu ta funciona independientemente di e realidad economico di cada isla.

E minister a splica cu durante e proximo periodo lo investiga, den cooperacion cu e islanan, cua necesidadnan ta existi y den cua manera Economisch Groeiplatform Carib por ofrece un balor adicional.

Esaki ta nifica cu ainda no a determina exactamente cua actividadnan e plataforma lo desaroya, cua responsabilidadnan e lo asumi ni con e cooperacion entre e diferente islanan lo ser organisa.

Pa Aruba, e iniciativa por representa un oportunidad pa participa den un proceso regional enfoca riba crecemento economico y innovacion. Sinembargo, e documento no ta identifica ningun proyecto concreto cu lo ser ehecuta na Aruba den cuadro di e plataforma. Tampoco no ta menciona cua institucionnan na Aruba lo participa formalmente ni cua sector economico local lo ricibi prioridad.

Un di e aspectonan cu ta sobresali den e contestanan ministerial ta e bishita cu Herbert a realisa na Aruba, Corsou y Boneiro na comienso di november.

Durante e bishita aki, e minister a combersa cu representante importante tocante e iniciativa. E informacion ta confirma cu Aruba a forma parti di e intercambio durante e fase preparatorio di EGC.

Sinembargo, e documento no ta identifica e persona of organisacionnan cu a participa den e reunionnan, ni ta presenta conclusionnan specifico di e combersacionnan teni na Aruba. Tampoco no ta indica si durante e bishita a haci acuerdo concreto tocante participacion di Aruba, financiamento of seleccion di proyectonan economico.

E diferencia aki ta importante, considerando cu existencia di dialogo entre gobierno Hulandes y representante di e islanan no ta automaticamente nifica cu un proyecto ya a ser aproba pa ehecucion.

Otro elemento central den e discusion ta e relacion entre e plataforma nobo y iniciativanan cu ya ta existi den Caribe.

Segun e minister, e intencion no ta simplemente pa crea un structura adicional, sino pa desaroya un plataforma cu ta conecta cu iniciativa y structuranan existente.

E enfoke aki por ta relevante pa determina con EGC lo funciona den practica. Un di e preguntanan cu ainda mester haya contesta ta cua funcion adicional e plataforma por cumpli compara cu e mecanismonan di cooperacion y desaroyo economico cu ya ta existi.

E documento no ta presenta un inventario di e iniciativanan existente, ni ta indica cua di nan lo ser incorpora den e plataforma. Tampoco no ta cla si EGC lo concentra riba coordinacion, promocion di innovacion, identificacion di oportunidadnan economico of otro actividadnan relaciona cu desaroyo di e islanan.

Durante tratamento di presupuesto den Tweede Kamer, tambe a surgi pregunta tocante e oportunidadnan economico cu ta existi den Caribe, particularmente den relacion cu transformacion di infrastructura portuario.

E pregunta parlamentario a menciona cu transformacion di hafnan por ofrece oportunidadnan importante pa desaroyo economico den e parti Caribense di Reino.

E contestanan ministerial no ta confirma cu EGC lo financia modernisacion di hafnan, ni ta identifica ningun puerto na Aruba cu lo forma parti di un programa nobo.

Un di e puntonan mas importante den e documento ta relaciona cu disponibilidad di financiamento.

Minister Herbert a confirma cu, te na e momento aki, no tin fondo reserva pa Economisch Groeiplatform Carib.

E informacion aki ta indica cu, a pesar di e intencion politico pa desaroya e iniciativa y e encargo entrega na Deloitte Dutch Caribbean, gobierno Hulandes ainda no a destina un presupuesto specifico pa funcionamento di e plataforma.

E falta di fondo reserva ta un asunto importante, pasobra establecimento di un structura regional por rekeri recurso financiero, capacidad administrativo y personal cu por coordina diferente actividad.

Sinembargo, e documento no ta determina cuanto e plataforma lo costa, cua fuente di financiamento lo ser considera ni si e islanan lo mester contribui financieramente. Tampoco no ta cla si e iniciativa lo dispone di recurso pa sostene proyectonan economico directamente, of si su funcion lo limita principalmente na facilitacion di cooperacion.

E pregunta presenta den Tweede Kamer tabata enfoca precisamente riba e estado di establecimento di EGC, su alcance y si suficiente recurso financiero y capacidad ta disponible pa logra cu e iniciativa por funciona di manera exitoso.

E contesta di e minister ta mustra cu gobierno Hulandes ainda no tin un imagen completo di e necesidadnan financiero y organisatorio. Segun Herbert, na comienso di 2027 e ta spera di dispone di mas claridad tocante con Economisch Groeiplatform Carib por ser estableci, cua lo ta su alcance y cuanto recurso y capacidad lo ta necesario.

E minister a indica cu Tweede Kamer lo ser informa mas ampliamente durante spring di 2027.

Sinembargo, e documento no ta establece un fecha definitivo pa inauguracion of comienso operacional di EGC. Tampoco no ta confirma cu e plataforma automaticamente lo ser estableci na 2027. E fecha menciona ta relaciona principalmente cu e expectativa di haya mas claridad tocante su organisacion, alcance y necesidadnan.

Pa Aruba, esaki ta nifica cu ainda ta prematuro pa determina cua beneficio economico concreto e iniciativa por genera of cuanto recurso eventualmente lo ta disponible pa proyectonan local.

E posibilidad di participa den un plataforma regional por crea espacio pa intercambio di conocemento, cooperacion y identificacion di oportunidadnan economico. Sinembargo, esakinan ta posibilidadnan general y no resultado confirma di e iniciativa.

E informacion oficial tampoco no ta indica si Aruba lo dispone di un representacion permanente den e plataforma aki, ni con decisionnan lo ser tuma entre e seis islanan participante.

E preguntanan aki ta relevante considerando cu e islanan di Reino tin diferente structura gubernamental, tamaño economico y necesidadnan di desaroyo.

Aruba, Corsou y Sint Maarten ta paisnan autonomo den Reino, mientras cu Boneiro, Saba y Sint Eustatius ta forma parti di Hulanda como entidadnan publico special.

E diferencianan institucional entre e seis islanan ta importante pa preparacion di EGC. Sinembargo, e documento no ta aclaria con e diferencianan aki lo ser incorpora den e structura y administracion di e plataforma.

E iniciativa ta forma parti di acuerdo di coalicion Hulandes, pero ainda e ta den desaroyo. Deloitte Dutch Caribbean ta prepara un plan, mientras cu e islanan ta ser consulta. No obstante, ainda no tin presupuesto reserva ni un structura definitivo.

E siguiente fase lo mester determina si e propuesta por ser transforma den un plataforma operacional, con e lo contribui na economia di e islanan y cua recurso lo ta necesario pa logra e metanan contempla.

Pa Aruba, e desaroyonan di comienso di 2027 lo ta importante pa haya mas claridad tocante su posible participacion y e oportunidadnan cu Economisch Groeiplatform Carib eventualmente por ofrece. Te cu e momento ey, e iniciativa ta den su fase preparatorio, sin proyecto specifico anuncia pa Aruba y sin fondo reserva pa su establecimento.

Economia di Aruba ta proyecta un crecemento real di 3.7% pa 2026, segun cifranan di Centrale Bank van Aruba (CBA). Mientras cu turismo ta sigui crece y empresarionan ta mantene un perspectiva positivo, confiansa di consumidor ta keda abao. Na mesun momento, inflacion a yega 3.0% na september y mayoria di consumidor ta indica cu nan poder di compra a disminui.

E informacion ta forma parti di e publicacion “Quarterly Tables Real Sector 2026-III”, publica door di CBA dia 12 di november 2026. E documento ta presenta cifranan tocante actividad economico, confiansa di empresarionan y consumidor, turismo, prijsnan y diferente indicador di economia durante e di tres kwartaal di aña.

Segun e proyeccionnan, Producto Interno Bruto (GDP) nominal di Aruba lo yega aproximadamente Afl. 8.292 miyon na 2026, compara cu Afl. 7.912 miyon na 2025. Esaki ta representa un crecemento nominal di 4.8%, mientras cu crecemento real, cu ta tene cuenta cu cambio den prijsnan, ta proyecta na 3.7%.

E ritmo di crecemento real proyecta pa 2026 ta mas abao cu e 6.3% calcula pa 2025 y 5.5% di 2024. Esaki ta indica cu economia ta sigui expande, pero na un ritmo mas modera cu durante e dos añanan anterior. E cifranan di GDP pa 2026 ta provisional y por cambia ora mas informacion bira disponibel.

Consumo final ta proyecta na Afl. 6.092 miyon, compara cu Afl. 5.665 miyon na 2025. Den e categoria aki, consumo di hogarnan lo aumenta di Afl. 4.277 miyon pa Afl. 4.654 miyon, mientras cu consumo di gobierno ta proyecta na Afl. 1.438 miyon.

Inversion bruto di capital tambe ta proyecta pa aumenta, di Afl. 1.836 miyon na 2025 pa Afl. 1.934 miyon na 2026. Gran parti di e inversionnan aki ta bin di sector priva, cu un balor proyecta di Afl. 1.907 miyon.

Den sector comercial, e Business Perception Index a baha di 107,5 punto den e di dos kwartaal pa 106,1 den e di tres kwartaal. A pesar di e bahada, e indicador ta keda riba e nivel neutral di 100 punto, locual ta nifica cu sentimento general di empresarionan ta relativamente positivo.

E indice cu ta evalua condicion economico actual a baha di 107,8 pa 105,2 punto, mientras cu e indicador di expectativa pa e proximo seis luna a aumenta un tiki di 107,1 pa 107,2 punto.

E encuesta ta mustra cu 48.5% di empresarionan a reporta un mehoracion den condicionnan economico actual, mientras cu 36.4% no a mira cambio y 15.2% a indica un deterioro. Den e di dos kwartaal, solamente 6.4% tabata reporta un deterioro.

Tocante perspectiva pa e proximo seis luna, 46.2% di empresarionan ta anticipa un mehoracion, mientras cu mesun porcentahe ta spera cu situacion no lo cambia. Un 7.6% ta anticipa un deterioro.

E situacion ta diferente entre consumidor. Consumer Confidence Index a registra 93,3 punto den e di tres kwartaal, compara cu 93,6 den e di dos kwartaal. E indicador ta keda bao di e nivel neutral di 100 punto, reflehando un sentimento pesimista entre consumidor.

E indice di e situacion actual a baha di 93,2 pa 92,7 punto, mientras cu expectativa pa futuro a registra 93,2 punto, compara cu 93,6 den e kwartaal anterior.

Un di e resultadonan mas notable ta relaciona cu poder di compra. Segun e encuesta, 90.4% di consumidor ta indica cu nan no por cumpra mesun hopi cu seis luna pasa. Solamente 7.1% ta considera cu nan por mantene mesun nivel di compra.

Na mesun momento, 46.5% di e participantenan ta indica cu nan ta spaar menos placa cu seis luna pasa, mientras cu 26.3% ta declara cu nan no ta spaar. Solamente 4.5% ta reporta cu nan ta spaar mas placa.

E cifranan ta mustra cu un parti considerable di consumidor ta experimenta limitacion den nan capacidad di compra y spaar, a pesar di e crecemento economico proyecta.

E encuesta ta examina tambe disposicion di consumidor pa haci compranan grandi. Un 59.8% ta considera cu actualmente no ta un momento adecuado pa cumpra un auto, mientras cu 61.3% ta considera cu no ta un bon momento pa haci un prestamo.

Den caso di hipoteca, 63.8% di consumidor ta considera cu e momento actual no ta adecuado pa asumi e tipo di compromiso financiero aki. Solamente 9.0% ta considera cu ta un momento faborabel.

Mientras tanto, e cifranan di inflacion ta confirma un aumento den costo di bida. Na september 2026, e indice general di prijsnan di consumidor a yega 112,4 punto, compara cu 109,2 punto na september 2025.

Esaki ta representa un inflacion anual di 3.0%. Compara cu augustus, prijsnan a aumenta cu 0.3%, mientras cu e aumento durante di tres kwartaal tabata 0.4%.

E aumento di prijsnan no ta distribui igualmente entre tur categoria. Durante e di tres kwartaal, e aumento promedio anual den prijsnan di transporte tabata 7.6%, mientras cu cuminda y bebida sin alcohol a registra un aumento di 4.1%. Den categoria di restaurant y hotel, e aumento promedio tabata 8.7%.

Di otro banda, e categoria di operacion di hogar a registra un bahada promedio di 8.2%, mientras cu paña y sapato a registra un reduccion di 4.2%.

E diferencia entre categorianan ta importante, considerando cu e impacto di inflacion riba cada hogar ta depende di e tipo di producto y servicio cu nan ta consumi.

Turismo ta sigui representa un componente importante di actividad economico. Durante di tres kwartaal di 2026, Aruba a ricibi 421.125 turista cu a keda por lo menos un anochi na isla, compara cu 372.410 den e mesun periodo di 2025. Esaki ta representa un crecemento di 13.1%.

E cantidad di anochinan cu bishitantenan a pasa na Aruba a aumenta di 2.482.978 pa 2.801.980, ekivalente na un crecemento di 12.8%.

E mercado Norte Americano a registra 291.474 bishitante, un aumento di 5.4% compara cu mesun kwartaal di 2025. Di e total aki, 278.861 tabata bin di Merca.

Sinembargo, e crecemento mas fuerte a ser registra den mercado Latino Americano. E cantidad di bishitantenan proveniente di e region aki a aumenta di 67.276 pa 98.875, un crecemento di 47.0%.

Mercado Europeo tambe a registra un aumento, di 18.717 pa 21.048 bishitante, ekivalente na 12.5%.

E indice di diversificacion turistico a baha di 0,51 na di tres kwartaal di 2025 pa 0,46 na mesun periodo di 2026. Segun metodologia di CBA, un indice mas abao ta indica menos concentracion den mercado turistico y, consecuentemente, mas diversificacion segun pais di origen.

Durante e prome nuebe lunanan di 2026, Aruba a ricibi aproximadamente 1,27 miyon turista cu a permanece na isla, compara cu aproximadamente 1,13 miyon durante mesun periodo di 2025. Esaki ta representa un aumento acumula di 11.6%.

Den turismo di crucero, Aruba a registra 141.890 pasahero durante di tres kwartaal, compara cu 138.233 den mesun periodo di 2025. E cantidad di bishita di barco a aumenta di 44 pa 47.

Consumo di electricidad tambe a registra un aumento durante di e di tres kwartaal di 2026, yegando 260,4 miyon unidad di electricidad, compara cu 249,5 miyon den e mesun periodo di 2025.

E indice general di utilidadnan a aumenta di 178,8 pa 196,7 punto. E indicador aki ta combina consumo di awa, electricidad y gas, aunke e cifranan di awa pa di tres kwartaal di 2026 ainda no tabata disponibel den e publicacion.

E datonan di construccion ta mustra cu 257 permiso di construccion a ser otorga durante di tres kwartaal di 2026, compara cu 267 den mesun periodo di 2025. Sinembargo, e balor total di e permisonan a aumenta di Afl. 193,8 miyon pa Afl. 223,1 miyon.

Di e permisonan otorga, 99 tabata relaciona cu casnan y 62 cu apartamento. E balor di permisonan pa apartamento a yega Afl. 79,2 miyon, compara cu Afl. 78,0 miyon durante e mesun kwartaal di 2025.

E cifranan ta mustra cu economia di Aruba ta sigui crece, particularmente den turismo, consumo y inversion. Sinembargo, e desaroyo positivo aki no ta refleha completamente den confiansa di consumidor, cu ta sigui enfrenta preocupacion tocante poder di compra y aumento di costo di bida.

E resultado di e di tres kwartaal ta indica cu crecemento economico no necesariamente ta traduci den un mehoracion di situacion financiero di hogarnan. E publicacion mas reciente di CBA ta mustra cu, a pesar di e crecemento economico, hopi consumidor ainda ta enfrenta dificultad financiero y presion riba nan poder di compra.