E edicion imprimí di Solo di Pueblo pa awe, 5 November 2026, ta disponibel completo na Issuu.

Historia, memoria y identidad tabata e temanan central durante e conferencia di prensa cu a tuma luga dia 3 di november 2026, den Sala Diamante di Biblioteca Nacional Aruba. Durante e encuentro, Fundacion Museo Arubano (FMA) y Biblioteca Nacional Aruba (BNA), den colaboracion cu Departamento di Cultura Aruba (DCA), a presenta e proximo proyeccionnan di e documental Affiba, de oudste vrouw van Paramaribo, di cineasta Ida Does, cu participacion di Joan Windzak.

Sr. Junior Arends, di Departamento di Cultura Aruba, a habri y modera e conferencia, dunando bon bini na prensa y tur esnan presente. El a introduci e programa, cu a ofrece un acercamento na e documental, su conexion cu e proyecto E Testigo Silencioso y e actividadnan educativo cu lo acompaña e bishita di e cineasta na Aruba.

Como prome orador, Sra. Astrid Britten, directora di Biblioteca Nacional Aruba, a destaca cu compronde nos pasado ta esencial pa duna forma na nos futuro. El a splica cu e cooperacion cu FMA ta crea espacio pa educacion, reflexion y dialogo tocante historianan lubida of silencia, sclavitud, resistencia y emancipacion den Caribe Hulandes y Surinam. Tambe el a haci referencia na e reciente presentacion di Prof. Dr. Michiel van Kempen, como parti di e cooperacion aki.

Na nomber di FMA, Sra. Gislaine Winterdaal a presenta E Testigo Silencioso, un proyecto financia cu fondonan di De Nederlandsche Bank, cu ta enfoca riba e pasado di sclavitud y su influencia riba nos comunidad. E iniciativa tin como meta pa duna reconocimento na historianan cu a keda silencia y pa crea conscientisacion tocante e rastronan cu e pasado a laga den nos cultura y identidad.

E proyecto ta consisti di tres componente principal: restauracion, educacion y conscientisacion. Esakinan ta inclui restauracion di e toren di Fort Zoutman, actualisacion di material educativo den colaboracion cu Universidad di Aruba — cu awor ta disponibel tambe na Papiamento — y organisacion di actividadnan den cooperacion cu Biblioteca Nacional Aruba. Winterdaal a destaca cu e presentacion di Affiba ta contribui na reflexion y dialogo tocante nos historia comparti den Caribe.

Cineasta Ida Does a conta cu e documental a nace for di e investigacion di Joan Windzak tocante un fotografia di Affiba, saca na Paramaribo na 1896. Affiba a nace den sclavitud, tabata mama di diesun yiu y a biba mas cu un siglo. A traves di documentonan di archivo, historianan familiar y contribucionnan di descendientenan, e pelicula ta reconstrui e bida di e muhe tras di e fotografia.

Pa e cineasta, conta e historianan aki ta un acto di reconocimento na personanan cu nan bida y contribucionnan a keda den sombra. Su trabou ta invita publico pa reflexiona riba ken ta conta nos historia, cua bosnan nos ta scucha y cua bosnan ainda no a haya espacio pa wordo scucha.

Durante su estadia na Aruba, Does lo bishita tambe dos scol pa comparti su experiencia como cineasta y escritora, incluyendo su novela Virginia. Cu e encuentronan aki, e cineasta kier inspira hobennan pa explora historia, imaginacion y e poder di conta cuenta.

Como ultimo orador, Sr. Mirtho Lacle, gestor cultural, a destaca con un fotografia por habri caminda pa un documental cu ta rescata historia y bosnan di diferente generacion. El a describi Affiba como e relato di un muhe cu a nace den sclavitud, a biba den libertad y a enfrenta inhusticia cu determinacion y resiliencia.

Lacle a pone enfasis riba e contraste entre papia y keda den silencio. Den su reflexion, el a destaca cu Affiba a laga su bos resona y a transmiti su forsa na diferente generacion. Su mensahe ta transcende tempo y frontera, conectando pasado, presente y futuro.

El a invita comunidad pa sigui rescata e bosnan di nos ancestronan y fortalece consciencia humano contra inhusticia, pa medio di enseñansa y educacion.

Proyeccionnan di documental “Affiba”

E proyeccion di diabierna 6 di november 2026 ta destina exclusivamente pa invitadonan.

Publico general ta cordialmente invita pa e proyeccionnan di diasabra 7 y diadomingo 8 di november 2026, na Principal Theater, San Nicolas.

Entrada ta Afl. 5 pa persona.

FIN

Diaranson atardi, mester a tuma lugar tratamento di e caso penal contra Chania Chante Fernandes Pedra, relaciona cu e accidente riba 4 Januari 2025, caminda el a dal mata e dama Josely Paulina Vasquez (65) y e homber Carlos David Vialez Valeiro (54) y sigui core bay.

   SOLO DI PUEBLO por a compronde cu Chania Fernandes Pedra a bolbe presenta sin abogado. Hues a dicidi cu a trata e caso tog. E ora ey Chania Fernandes Pedra a haci un keho contra Hues. Esey a causa cu e caso mester a wordo pospone.

Awe atardi, Hues a cuminsa cu tratamento di e caso penal contra Chania Fernandes Pedra, kende Fiscal ta acusa cu riba 4 Januari 2025 a dal mata e dama Josely Paulina Vasquez (65) y e homber Carlos David Vialez Valerio (54) y sigui core bay. Tambe Fiscal ta acusa Fernandes Pedra di tabata core e Jeep sin rijbewijs, core bou influencia di alcohol, core cu velocidad halto y tabata den un situacion emocional. Tambe Fernandes Pedra ta wordo acusa di intento di mata señora Williams y e homber Fernandes Rivas, kendenan tambe e momento ey tabata cruzando caminda.

CAMBIO DEN ACUSACION

Fiscal a presenta un cambio den e acusacion. Fiscal a splica cu a test Fernandes Pedra pa alcohol y ta poni den e raport cu ta mas cu 300 microgram di alcohol tabatin den su sanger. Fiscal a pidi Hues pa cambia esaki na 295 microgram. Ta asina cu Hues a bay di acuerdo cu e cambio aki.

ATROBE NO TIN ABOGADO

   Ta asina cu Chania Fernandes Pedra a presenta su so. Hues a bisa cu e ta disapunta cu ainda Chania no tin abogado.

Hues a bisa cu ayera mainta Chania a manda un mail pa Hues pa pospone e caso door cu no tin abogado y pa lag’e liber.  

Hues a bisa cu tin un procesverbaal di loke a sosode tur biaha cu Chania Fernandes Pedra a presenta sin abogado y tur e procesonan cu a haci pa Chania Fernandes Pedra haya abogado liber, esta cu Gobierno ta paga. Tur esaki no a duna resultado.

REACCION FISCAL

Fiscal ta haya cu a base EVRM (Derechonan Humano), ta derecho fundamental pa Chania tin un abogado. Mester dun’e e tempo necesario pa prepara pa e caso. Fiscal ta haya cu mester tene cuenta cu otro interesnan cu ta e famianan di e victimanan. Na opinion di Fiscal, despues di 5 caso y cantidad di abogado cu pa un of otro no ta defende Chania Fernandes Pedra, e ta haya cu mester sigui cu e caso. E abogado mr. Hatzmann cu ta representa e famianan di e victimanan, ta comparti punto di bista di Fiscal. E ta haya cu mester sigui cu e caso. E interes di comunidad y famianan di e victima mester prevalece riba e derecho di Chania. Hues a pospone e caso un rato pa bay evalua riba e peticionnan di Chania.

HUES A SIGUI CU E CASO

Hues a bolbe y a bisa cu e ta bay di acuerdo cu e cambio den acusacion pidi pa Fiscal caminda e grado di alcohol ta baha. Hues a bisa cu Chania tin un caso masha serio y ainda no tin abogado. Hues ta haya sumamente fastioso e caso aki pasobra mester tuma decisionnan teniendo cuenta cu tur interesnan. E situacion cu ta haya abogado liber y ta wordo rechaza, na opinion di Hues no tin bista riba abogado cu lo por paga y tampoco pro deo. Hues ta haya cu no tin sentido pa sigui pospone e caso. Hues a bisa cu e ta sigui cu e caso.

Ta asina cu Chania a grita NO y a lanta y kier a sali for di sala. Guarda di CEA a par’e pa sali. Chania a cuminsa yora y a bisa cu e no kier. Hues a bis’e cu e ta bay sigui cu e caso. Hues a bay di acuerdo pa Chania sali un rato. Escolta pa miembronan di CEA, Chania a sali for di sala di Corte bao yoramento. Hues a bolbe y Chania ta keto bay na yoramento y no kier drenta den sala di Corte. Na dado momento el a drenta y Hues a bisa Chania cu e tin derecho di si cu e no kier ta presente e por bandona sala pero e caso ta wordo trata y aki tres siman lo tin sentencia.

Chania a bisa Hues cu e kier tey pero e no por.

CHANIA A BANDONA SALA

Ora Hues a cuminsa cu tratamento di e caso, Chania a bisa Hues cu e no por. El a pidi e famianan pordon pa loke a pasa y a bandona sala.

CHANIA TA KEHA HUES

   Na dado momento Chania a pidi pa e bay bek den sala. Un rato despues cu e ta den sala, por a mira un dama di oficina di Corte trata un mail pa Hues. Hues a bisa cu a drenta carta na nomber di Chania cu ta keha Hues cu no ta trata e caso na un forma husto y cu e no tin confianza den Hues. Hues a bisa cu e ta haya straño cu esaki ta sosode. Hues a puntra kico ta e motibo y Chania a bisa cu e ta haci uso di su derecho di silencio.

DIABIERNA TA TRATA KEHO

Hues a pospone e caso un rato pa bay check kico ta e procedura. Un rato despues el a bolbe y a bisa cu e ta caso pospone e caso y Diabierna awor 6 November 2026 pa10’or di mainta, tres Hues lo bay atende e keho. Pa loke ta tratamento di e caso, Hues a fiha 18 November 2026.