Den e Evangelio di awe, nos ta mira Hesus ta drenta cas di un Fariseo riba dia di sabat. Nan tabata vigil’E pa mira si E lo a cura un homber cu tabata hopi malo. Hesus, conociendo nan curason, a haci un pregunta simpel pero profundo tocante si ta permiti pa yuda un hende riba dia di descanso. E Fariseonan a keda keto. Pa nan, e reglanan tabata mas importante cu e dolor di un ser humano. Pero Hesus a mustra nan cu amor, compasion y e bienestar di nos prohimo mester ta semper na prome luga. El a mishi cu e homber y a cur’e. Awe, e texto aki ta corda nos cu nos no mester laga regla of custumber haci nos curason duro pa e dolor di otronan. Dios su curason ta yena cu amor incondicional, y E ta yama nos pa ta e mannan cu ta yuda y e curason cu ta compadece.

Oracion: Nos bon Dios, danki pa Bo amor y Bo ehempel di compasion. Yuda mi pa no pone e reglanan di mundo prome cu e dolor di mi prohimo. Yena mi curason cu Bo sensibilidad pa mi por stima y yuda esnan cu tin mester, sin husga. Siña mi pa biba tur dia cu e mesun amor cu Hesus a mustra na nos. Amen.

Hof di Corte Superior a trata e apelacion di Procurador General (PG) contra e sentencia di Hues, caminda a declara R.R. (56) liber di droga y labamento di placa.

   SOLO DI PUEBLO por a compronde cu PG ta haya R.R. culpabel di cantidad di cocaina y marihuana. Tambe cu R.R. ta culpabel di labamento di placa. Abogado mr. Emerencia a mustra cu e hecho cu Hues a declara R.R. liber ta pasobra no tin prueba.

   PG ta acusa R.R. cu entre 12 Jan 2016 y 27 Mei 2020, R.R. tabata anda cu droga. PG tambe ta acusa R.R. di labamento di placa y tambe di tin diferente auto den e mesun periodo.

PG a bisa Hof cu Ministerio Publico ta apela e cuestion cu riba 27 Mei 2020, R.R. tabata den posecion di droga y tambe labamento di placa.

DROGA WARDA DEN CASHI

Dia 27 Mei 2020, Polis a haci investigacion na cas di R.R. y a haya marihuana y cocaina. Tin mas hende ta biba na e cas. Hof ta puntra R.R. si tabatin droga den e cas. Segun R.R., e ta un adicto di droga y no tabata sa cu tabatin droga den cas. El a bisa Hof cu si e tabata sa di e droga, esey lo a caba masha tempo. Hof a mustra cu den un cashi a haya 100 gram cocaina y 130 gram di marihuana. E cashi tabata den camber di R.R. su mama. Hof a bisa cu e mama di R.R. a bisa Polis cu R.R. ta drumi den un cuarto banda di dje. R.R. a bisa cu ora su mama ta malo, e ta bay drumi hunto cu su mama. El a bisa cu su mama a fayece. Ta asina cu Polis a haya 14 mil florin den un tas. Segun R.R., e placa ta di dje y el a duna su mama warde p’e. Hof a bisa cu e mama a bisa cu R.R. ta warda placa den e mama su cashi den un tas bruin. Hof a bisa cu mirando cu R.R. ta drumi serca e mama, e ta logico cu e droga cu a haya den e cashi di e mama, ta di R.R. Segun R.R., tur hende den e cas ta bay serca su mama den camber. El a splica cu e ta adicto y e ta cumpra droga y hiba cas pa usa.

   Hof a mustra cu R.R. a declara cu ora su mama sali, e ta sera e camber na yabi y su mama tin yabi di e camber. R.R. ta para riba cu e no sa nada di e droga.

LABAMENTO DI PLACA

Hof a bisa cu ademas di e 14 mil florin, a haya diferente auto na e cas. Ta parce cu door di placa di droga, R.R. a cumpra e autonan. Segun R.R., el a haya herencia di su tata y su ruman grandi. El a haya mas o menos 14 mil florin, un yate y 2 auto di su ruman homber. Segun R.R., el a bende e yate pa 10 mil dollar. R.R. a bisa cu ora su tata a fayece el a haya mas o menos 15 mil florin. El a bisa cu e Toyota Yaris ta di su tata. E tabata huur esaki. E otro autonan tambe tabata di su tata. Tambe e tabatin un Hummer cu el a cumpra pa 30 mil florin. Hof a puntra di unda el a haya e placa. El a splica cu e tabata bay baha boto den laman pa hende y e tabata wordo paga. Tambe e tabata huur 3 auto y tabata gana mas o menos 500 florin pa luna. Hof a remarca cu Ministerio Publico ta cuestiona cu R.R. ta adicto y con e tabata haya placa pa droga y auto. Segun R.R., e tabata spaar y no ta gasta placa pa loco.

EXIGENCIA PG

PG a bisa cu e esaki ta un caso bieu, caminda na 2024, R.R. a wordo declara liber y PG a apela. PG a bisa Hof cu e no ta compronde con Hues ta declara R.R. liber di e droganan siendo cu a haya e droganan y placanan den e camber di e mama. PG a bisa cu 27 Mei 2020 durante investigacion na e cas, Polis a haya cocaina y marihuana. Tambe a haya placanan. PG a bisa cu e no ta kere R.R. cu e no tabata drumi serca su mama. PG a mustra cu ta solamente e mama y R.R. sa di e tas cu R.R. tin den e cashi. Den e cashi a haya 14 mil florin. PG ta haya legalmente proba cu R.R. tabata den posecion di cocaina y marihuana. Tambe PG ta haya legalmente proba cu R.R. tabatin 14 mil florin. El a mustra cu e mama a declara cu e sa cu e tas ta di R.R. y cu e tas tabata den e cashi.

   PG a mustra tambe cu R.R. no tabata paga belasting di e placanan cu e ta gana. Na opinion di PG, R.R. tin 13 mil florin riba un cuenta di banco y e no ta paga belasting. PG a mustra cu R.R. a declara cu e tabata huur boto y gana mas o menos 4 mil dollar pa luna. El a haya herencia di su tata cu a fayece. E tabata huur auto tambe. E tabatin un Hummer cu el a cumpra pa 25 mil florin. PG a señala cu R.R. a cumpra algun auto cu ta suma 60 mil florin y R.R. no a demostra na Belasting con el a yega na placa y kico ta su gastonan. PG. no ta kere declaracion di R.R. pa cu e placa, e autonan y boto. P.G. ta haya R.R. culpabel di posecion di droga y labamento di placa.

   Pa cu e castigo, PG a bisa cu mirando tur e tempo cu a pasa, el a exigi castigo igual na e tempo cu R.R. tabata sera cu ta 184 dia. PG a exigi pa confisca e placa na banco y e placanan cu a confisca ta keda confisca. E droganan mester wordo destrui. E autonan lo keda confisca.

DEFENSA DI ABOGADO

Abogado mr. Emerencia a bisa cu R.R. a wordo declara liber di e droganan cu a haya 27 Mei 2020. E abogado a bisa Hof cu R.R. no a wordo haya cu cocaina sino algun marihuana den un tas di haci compras. E abogado a mustra cu R.R. tabata hunto cu mas hende den e cas y hunto cu su mama. R.R. tabata keda den e sala di e cas. Segun mr. Emerencia, no ta solamente R.R. tabata bay den e camber. Tabatin mas hendenan cu tabata bay den e camber serca e mama. Na opinion di abogado, ta solamente e mama tabata bisa cu R.R. tabatin un tas den e cashi. Esey no kiermen cu e droganan tabata den e tas aki! E droga tabata den un tas di compras cu no ta di R.R. E mama a bisa cu e tas di compras tabata di dje. Ningun momento e mama a bisa cu R.R. tin droga den e tas. E mama a bisa Polis cu e no ta kere cu e droga ta di R.R. E abogado a bisa Hof cu R.R. a bisa cu e ta adicto y ta usa diferente sorto di droga pero cu R.R. ta na tino. Abogado ta haya cu no tin prueba legal cu R.R. ta responsabel pa e droganan haya. E abogado a remarca cu e hecho cu R.R. tin acceso na e camber di e mama, no kiermen cu e droga haya ta di R.R.

   Pa loke ta e labamento di placa, e abogado a remarca cu PG ta bisa cu Belasting no tin informacion di entradanan di R.R. y cu a haya 14 mil florin den e cas. Tambe cu PG a calcula cu mas o menos 60 mil florin a gasta na cumpra autonan. E abogado a mustra na Hof cu tin diferente caso den pasado di R.R. caminda a hay’e cu cantidad chikito di droga pa propio uso. E abogado a accentua, cu esey no kiermen cu R.R. ta deal den droga! E abogado a bisa Hof cu e no ta haya cu tin un fuente di entrada ilegal. El a remarca, cu e hecho cu R.R. no a paga belasting no tin nada di haci cu labamento di placa y droga. Esey ta un asunto completamente separa. E abogado a mustra cu R.R. a bisa cu e tabata traha riba beach y tabata gana su placa cu watersport. El a bisa cu R.R. a splica tambe e herencia cu el a haya di su ruman homber grandi cu a fayece y su tata cu tambe a fayece. E abogado a bisa Hof cu e no ta haya cu por prueba cu R.R. ta culpabel di labamento di placa. E abogado a mustra cu R.R. a splica for di unda el a haya e placanan. E abogado a mustra na Hof cu Corte den Promer Instancia a declara R.R. liber di labamento di placa pasobra no tin prueba. E abogado a bisa cu e autonan y placa di banco ya tin 6 aña confisca y e ta haya cu R.R. mester haya interes riba e placa aki.

   Hof a bisa cu e ta bay studia e caso y dia 17 November 2026, lo tin sentencia.  

Aruba Bank a demonstra su compromiso cu comunidad door di patrocina y participa den e “Over the Moon” Charity Night Golf Tournament, organisa pa Kiwanis Club of Palm Beach.

E evento a combina competencia amistoso cu un meta comun: recauda fondo pa obranan di caridad. Ademas di su patrocinio, Aruba Bank a participa cu un ekipo di coleganan cu a uni nan entusiasmo y talento pa golf pa sostene e iniciativa.

Herman Brown, Lucio Maduro, Ryan Koolman y Bryan Nemecek a representa Aruba Bank. Nan participacion a duna un toque personal na e contribucion di banco, mustrando con coleganan por traha hunto pa sostene comunidad a traves di deporte.

Aruba Bank ta felicita Kiwanis Club of Palm Beach cu e organisacion di e torneo y ta gradici su ekipo pa representa banco cu dedicacion y compromiso cu comunidad.

Door di patrocinio y participacion activo, Aruba Bank ta orguyoso di sostene iniciativanan cu ta uni hende y stimula contribucionnan na bon causanan na Aruba.

Sindicato di Trahador den Telecomunicacion (STT) ta expresa publicamente su  preocupacion serio tocante e vacatura pa e puesto di director nobo di SETAR N.V. E  condicionnan cu ta menciona den e vacatura, especialmente e contrato di cinco aña y e  posibilidad pa candidato di exterior, ta lanta basta pregunta cerca STT. 

SETAR N.V. no ta solamente un compania di telecomunicacion. Ta un compania Arubiano  cu tin un papel importante den economia di nos pais. SETAR ta duna trabou na hopi hende,  tanto directamente como indirectamente, y su inversionnan den infrastructura y tecnologia  ta contribui na desaroyo di Aruba. Pa esey, e futuro di SETAR no ta solamente un asunto di  e compania mes, sino algo cu ta importante pa nos comunidad. 

Durante e ultimo 23 aña, desde cu SETAR a bira SETAR N.V., nos a conta cu un director cu a  sali di den SETAR mes. Durante e periodo aki, SETAR a sigui crece, inverti den tecnologia,  enfrenta competencia y mantene su posicion den mercado di telecomunicacion. Esaki ta  demostra cu liderazgo interno por funciona y cu den SETAR tin conocimiento y experiencia  pa dirigi e compania. 

Pa esey, STT ta keda cu e pregunta pakico awor ta necesario pa habri e porta asina amplio  pa candidato di exterior, mientras cu nos propio profesionalnan Arubiano tin añanan di  experiencia y conoce SETAR di paden. 

Loke ta preocupa STT especialmente ta e contrato di cinco aña cu ta menciona den e  vacatura. No mucho tempo pasa a logra cu e director actual por keda dos aña mas,  precisamente pa mantene continuidad y estabilidad den SETAR. Awor nos ta mira cu ta  contempla un contrato di cinco aña pa un director nobo, mientras cu SETAR ta cay bou di  LNT. 

Nos ta puntra nos mes pakico cinco aña ta necesario y con esaki ta cuadra cu e situacion  actual di SETAR. 

Otro punto cu ta lanta preocupacion ta cu den e vacatura ta menciona posibilidad pa  candidato di exterior muda bin biba na Aruba, como tambe exigencianan relaciona cu  permiso di trabou. Ademas, experiencia den telecomunicacion no ta aparece como un  exigencia principal, mientras cu candidato cu experiencia den otro sector tambe por  cualifica. 

Pa STT, esaki ta lanta e pregunta si e condicionnan di e vacatura no ta habriendo e porta  mas amplio pa candidato di exterior, mientras cu nos propio profesionalnan por termina  den un posicion menos favorable.

STT no ta contra ningun candidato solamente pa motibo di su nacionalidad. Pero nos ta  kere cu un compania manera SETAR, cu ta opera den un mercado competitivo y cu ta  enfrenta cambionan tecnologico constante, mester duna gran importancia na  conocimiento di telecomunicacion, experiencia y comprension di nos mercado local. 

Nos no por lubida tampoco cu STT y su miembronan a lucha den pasado pa evita cu SETAR  wordo bendi. E lucha ey tabata pa conserva SETAR como un compania di pueblo Arubiano.  Ta e mesun compromiso ey cu ainda ta motiva STT pa para firme ora cu nos ta mira  desaroyonan cu por afecta futuro di SETAR. 

Tambe nos ta preocupa pa cu e relacion cu LNT. STT a expresa anteriormente su  preocupacion tocante e efecto cu e ley aki por tin riba SETAR y su profesionalnan. Nos no  lo considera aceptabel si eventualmente ta haci un excepcion pa facilita nombramento di  un director di exterior, mientras cu nos propio profesionalnan Arubiano ta sigui bou di e  limitacionnan di e mesun ley. 

STT no lo keda sinta keto y mira con ta habri e porta pa candidato di exterior, sin cu nos  propio profesionalnan haya e reconocemento y oportunidad cu nan merece. 

Nos ta papia di un compania cu durante hopi aña a demostra su balor pa Aruba y cu su  trahadonan a contribui diariamente na su desaroyo. E nombramento di un director nobo ta  un decision cu lo tin consecuencia pa futuro di SETAR, su trahadonan y nos pais. 

SETAR tin 23 aña cu a bira SETAR N.V., y durante e periodo aki nos a conta cu un  director cu a sali di den SETAR mes. E experiencia aki a demostra cu nos propio  profesionalnan tin e capacidad pa lidera SETAR. STT ta kere cu nos profecional nan  interno merece e confianza y oportunidad pa sigui haci esaki. 

Sindicato di Trahador den Telecomunicacion (STT)