SETAR ta orguyoso pa anuncia cu nos ta oficialmente reseller di Hewlett Packard Enterprise (HPE), un lider mundial den solucionnan tecnologico pa companianan. E desaroyo importante aki ta marca un otro logro den e compromiso di SETAR pa sostene e transformacion digital di e comunidad corporativo na Aruba door di brinda acceso na solucionnan di IT avansa, confiabel y future-ready.

Pa celebra e logro aki, SETAR a organisa un business lunch exclusivo den colaboracion cu Westham Trade Company, sales partner di HPE, treciendo asina hunto representantenan di nos comunidad corporativo. 

Hewlett Packard Enterprise ta reconoci globalmente pa su solucionnan innovatico den enterprise computing, data storage, hybrid cloud, networking y inteligencia artificial (AI). HPE ta yuda organisacionnan rond mundo pa modernisa nan IT environment, mehora eficiencia operacional, fortalece proteccion di data y acelera innovacion digital. 

Como un reseller oficial di HPE, SETAR awo por ofrece companianan na Aruba un portfolio mas amplio di solucionnan di IT corporativo, combinando e tecnologia avansa di HPE cu SETAR su presencia local, experiencia y servicio na cliente. 

Durante e evento, Director di SETAR, Roland Croes, a enfatisa e importancia pa continuamente expande e servicionan di SETAR pa cumpli cu e necesidadnan di companianan local cu ta sigui evoluciona. Ismael Hernandez di Westham Trade Company a introduci e tecnologianan innovativo di HPE y a splica con e solucionnan aki por yuda organisacionnan mehora eficiencia, fortalece proteccion di data y modernisa nan infrastructura di IT. 

E logro aki ta reenforsa e posicion di SETAR como e proveedor confiabel di solucionnan di ICT, ofreciendo companianan mucho mas cu solamente servicionan tradicional di telecomunicacion.

Cu HPE su expertisio global y e presencia local di SETAR, companianan na Aruba por tuma e siguiente paso cu confiansa pa un futuro mas conecta, sigur y innovativo.

Bo ta interesa pa sa con e solucionnan aki por yuda bo compania? Tuma contacto cu bo Account Manager di SETAR of manda un email na sales@setar.aw pa mas informacion.

Aruba One Happy Island Lions Club hunto cu POH cu presentacion exitoso pa crea consciencia tocante diabetes na Traimerdia Conrado Coronel

Como parti di nos Campaña di Conscientisacion tocante Diabetes 2026, Aruba One Happy Island Lions Club cu cooperacion di POH (Praktijkondersteuner Huisartsenzorg) a organisa cu exito un presentacion educativo na Traimerdia Conrado Coronel. Jufrouw Jo-Eve Felten di POH a duna e presentacion.

Durante e sesion interactivo, e muchanan a siña tocante e importancia di come saludabel, haci actividad fisico regularmente y mantene un estilo di bida saludabel. E habitonan aki ta pasonan importante pa yuda preveni diabetes y promove bienestar general.

Cu e iniciativa aki, nos kier anima muchanan pa haci escogencianan mas saludabel for di chikito y pa compronde cu e cosnan chikito cu nan haci tur dia por haci un diferencia grandi den nan salud den futuro.

Na final di e presentacion, cada mucha a ricibi un buki educativo tocante diabetes titula Healthy Kids, Happy Future, hunto cu un appel fresco y un boter di awa. E regalonan aki a reforza e mensahe di haci escogencianan saludabel tur dia. E buki tambe a duna e muchanan informacion valioso cu nan por comparti cu nan famia.

Aruba One Happy Island Lions Club ta gradici di curason e muchanan, e leidsternan y henter e personal di Traimerdia Conrado Coronel pa e acogida caluroso, nan entusiasmo y participacion activo. Nos ta gradici tambe Jufrouw Jo-Eve Felten y POH pa nan colaboracion valioso y nan compromiso pa crea mas consciencia tocante diabetes.

Hunto nos ta educa, inspira y contribui na un generacion mas saludabel!

 Actua na tempo contra diabetes!

Aruba One Happy Island Lions ClubWe Serve – Road to 10 Years | 2017–2027

Matthijs van Beusekom y Bente Janssens di Representacion di Hulanda na Oranjestad (VNO) a bishita The Sunshine House, un pasadia pa adulto mayor na San Nicolas. Aki adultonan mayor por reuni, participa na actividadnan y mantene contacto social. Di e forma aki, e pasadia ta contribui pa nan keda activo y por sigui biba di forma independiente pa mas tempo.

Pa medio di Klein Projecten Fonds (KPF), VNO a otorga un contribucion di AWG 7.500 pa compra di aparatonan nobo di aire acondicionado. Durante e bishita tabata bunita pa mira con e contribucion aki ta beneficia e adultonan mayor y e personanan cu ta dedica nan mes diariamente na nan bienestar.

E aña aki VNO a sostene mas cu trinta proyecto social na Aruba, entre otro iniciativanan di Stichting Leerorkest Aruba y Fundacion Respeta Mi.

Cu e KPF, VNO ta sostene proyectonan cu ta contribui di forma positivo na e comunidad di Aruba, por ehempel riba tereno di bienestar, enseñansa, cultura, deporte y sostenibilidad. Organisacionnan social por solicita un contribucion di te un maximo di AWG 7.500 pa proyecto.

E presupuesto di KPF pa 2026 a wordo utiliza completamente. Na 2027 VNO lo bolbe ricibi solicitudnan nobo pa proyectonan cu lo tuma luga den e aña ey. Bo kier sa mas tocante e posibilidadnan y condicionnan? Tuma contacto via VNOinfo@minbzk.nl.

Aruba Bank a apoya cu orguyo e simposio di Salud pa hoben adulto, organisa pa Vereniging Praktijkondersteuners Huisartsenzorg (POH297), den colaboracion cu Wit-Gele Kruis Aruba.

E simposio, cu a tuma lugar dia dia 12 di november, na Tierra del Sol, a reuni hoben adulto di 18 pa 25 aña pa un programa enfoca riba un estilo di bida saludabel, prevencion di malesa y educacion di salud. Charlanan dirigi pa dokter, un orador motivacional y actividadnan interactivo a encurasha e participantenan pa tuma un papel activo den nan propio bienestar.

Cu su apoyo, Aruba Bank a contribui na haci e iniciativa aki posibel, resaltando e importancia di educacion di salud accesibel y oportunidadnan pa hobennan por tuma decisionnan bon informa.

Aruba Bank ta felicita POH297 y Wit-Gele Kruis Aruba pa nan esfuersonan pa promove conscientisacion tocante salud den comunidad di Aruba.

Inverti den bienestar di hoben adulto ta un inversion den futuro di Aruba. Aruba Bank ta orguyoso di apoya organisacionnan comunitario cu ta traha pa e meta comparti aki.

Recientemente e curso “Leeskracht” a tuma luga na Instituto Pedagogico Aruba (IPA). Leeskracht ta dirigi riba motivacion di lesamento, placer di lesamento cerca muchanan multilingual. E curso ta consisti di cinco modulo. E meta di e programa ta pa provee docentenan cu herment y tipnan practico. Haciendo esaki nan ta impulsa e confiansa propio y disfruta di lesamento di e studiantenan. Di parti di Biblioteca Nacional Aruba a participa: Valerie Figaroa, Kimberly Rasmijn y Jarmin Croes (Flecha blauw). Na final tur participante a ricibi nan certificado.