E proyecto “Agrifund”, ehecuta pa Qredits Aruba, ta marcando un caminda revolucionario pa agricultura na Aruba, introduciendo “Agriloan” como un medio pa fortalece y diversifica e sector. Qredits Aruba hunto cu Ministerio di Asuntonan Economico, Comunicacion y Desaroyo Sostenibel, mr. Geoffrey Wever, cu sosten di Ministerio di Transporte, Integridad, Naturalesa y Asuntonan di Adulto Mayor, Ursell Arends, a lansa e proyecto aki pa complementa e “Agrifund” y duna guia pa sigui enforsa empresarialismo den e sector di agricultura. Un iniciativa cu ta haciendo un diferencia grandi na e bida di e agricultornan local y e futuro prometedor cu e ta creando pa agricultura na Aruba. Un aña despues di a cuminsa oficialmente cu e proyecto aki, Nathaly Harms di Qredits Aruba ta repasa e inicio, logro y vision pa futuro.

Impacto di 2% interes di “Agriloan”

“Agriloan” ta un prestamo comercial te cu Afl. 200.000 pa empresarionan nobo of existente den e sector di agricultura na Aruba. E prestamo comercial ta wordo ofreci na un interes reduci di 2% p’asina e agricultornan por haci e inversionnan necesario. E producto financiero aki lo yuda agricultornan comercial supera un di e retonan mas grandi den e sector, cu ta acceso na financiamento adecua pa e sector di agricultura. E tasa reduci di 2% ta adecua pa e sector di agricultura cu ta un sector cu risiconan significante y tambe cu tin necesidadnan y desafionan specifico cu e sector ta exigi. Aki por pensa riba e suma di inversion rekeri substancial pa cuminsa of expande, uso di tecnologia y innovacion, ciclo di produccion y risico di clima. Alabes, un interes reduci ta beneficia agricultornan comercial cu un rebaho di e gasto di financiamento, cu ta resulta na mas fluho di caha pa e negoshi.

Por lesa mas den nos edicion digital, tanto den Papiamento como na Ingles.

Desde un edad hopi hoben, ya Kailen Wouters a demostra cu su pasion y dedicacion pa BMX ta sin limite. Awe cu apenas 10 aña, e ta ya un figura reconoci internacionalmente, cu su mirada firme riba e titulo mundial, representando Aruba riba e nivel mas halto. Un soño cu por pre anticipa caba cu pronto, lo bira un realidad. Esaki ta su storia…

Su prome pasonan

Kailen su introduccion na BMX a bini na un edad sorprendentemente hoben. E experiencia a inicial na un careda di Strider cu a marca su caminda den e mundo di BMX, unda e rapidamente a avanza pa competencia mas serio y logra reconocimiento.

Ora e tabatin 7 luna, ya e tabata cana pues pa ora cu el a yega 1 aña, e tabata tur caminda su mayornan ta conta. Cu su 2 aña, e tabatin su prome experiencia den un careda di ‘Strider’. “Nos a bay wak un primo core na un careda di BMX di e team di Rough Riders. Ora nos a yega eynan cu e strider, algun mayor a convence nos pa presta un helm (casca di pinda nan ta yam’e) y laga Kailen djis purba y tuma parti na e careda di balance bike. Cu edad di 3 aña el a cambia pa un Mini BMX y di eynan, e no a para mas. El a siña pedal cune rond di cas,” su mayornan, kende a yuda forma su caminda como atleta, ta conta yena di orguyo.

Por lesa mas di Kailen su entrevista den nos edicion digital, tanto den Papiamento como na Ingles.

Naci na Maracaibo, Venezuela, Angel Soto (52) a demostra cu pasion y dedicacion por yega leu. Como un director, productor, scriptwriter, editor, director di fotografia, colorista di imagen, cameraman y actor innovativo, Angel a marca su print den e industria cinematografico tanto na Aruba como internacionalmente. Via su obra, no solamente ta sigui su pasion, pero tambe ta pone Aruba su nomber na halto riba e mapa mundial. Pero e realidad ta cu Angel su pasion pa e arte aki a culminsa desde un edad hopi hoben.

Trayectoria & logronan

E viahe cinematografico di Angel Soto a cuminsa cu su prome short film na 2020: un pelicula di horror titula “The Last Survivor”. Di eynan, su carera a tuma vuelo cu produccionnan manera “Lockdown” (2021), y su largometrahe di exito “BlackOut” (2022), cual a conkista reconocimento internacional, incluyendo e premio prestigioso di BEST DIRECTOR na e Festival di Pelicula SHUNYATAM na Mumbay, India.

Su capacidad pa conta storia captivante a sigui evidente den “The Search” (2023), “The Legend of Captain Al” (2023), y “The Rich Pirate” (2023), cada uno revelando un aspecto diferente di su talento versatil.

Por lesa mas di Angel su entrevista den nos edicion digital, tanto den Papiamento como na Ingles.

Naci na Aruba y lanta na Hulanda, Kim a descubri su pasion pa arte desde mucha caba. “Apesar di tabata hopi timido, arte tabata mi manera natural di expresa mi mes,” Kim ta comparti.

E influencia di su niñez, combina cu su amor profundo pa su isla natal, a inspir’e pa sigui un caminda creativo, unda e ta explora su identidad y expresa e rikesa di su herencia Arubiano cu ta haci Kim digno ta e BOS DI NOS TERA.

Influencia di cultura Arubiano

“Mi a crece na Hulanda y mi tabata haya hopi falta di Aruba. Nunca mi por a sinti mi mes na cas na Hulanda. E tabata gusta Hulanda den zomer pero pa e resto di e aña, e tabata haya tur cos poco grijs y deprimente mientras cu su arte ta full contrario. Mi arte semper tabata hopi colorido, mi ta kere cu tabata mi manera di escape for di e ambiente grijs rond di mi.” Aparte di esaki, Kim ta conecta su obranan di arte cu quotes poëtico of un cantica y laganan uni. “Tambe mi ta encanta biaha y conoce diferente culturanan. Mi ta pone hopi di mi experiencianan di biahe bek den mi arte.”

Por lesa mas di Kim su entrevista den nos edicion digital, tanto den Papiamento como na Ingles.

Cu su 23 aña, Ricardo Enrique Arends Cardona ta un fuente di inspiracion, demostrando cu e generacion nobo ta cla y comprometi na promove y preserva e identidad, cultura y historia di Aruba.

Naci na Colombia pero lanta na Aruba, Ricardo a comproba cu pasion y dedicacion por ta e chispa pa cambio real. Despues di completa su educacion basico na Aruba, el a sigui su estudio na Hulanda, unda su pasion pa storytelling y diseño di experiencia a haya forma. Awor, como e Director di Operations y Marketing pa “Aruba Downtown Walking Tours“ y Lighthouse, Ricardo ta liderando e caminda den ofrece experiencianan cultural unico, tanto na residentenan como turistanan. Sin duda, e ta un baluarte den su esfuerso pa mantene y celebra ken nos ta como Arubiano: Ricardo ta un berdadero BOS DI NOS TERA

Origen & Desaroyo

“Mi a lanta na Cunucu Abao, cerca di Bubali, unda mi tabata biba den un trailer cu mi famia. Serca di cas tabatin masha hopi mondi y despues di scol mi tabata gusta bay hunga den mondi, core bais of busca cualkier cos di haci pafo paso mi no tabatin playstation,” Ricardo ta comparti cu nos, dunando un bista intimo di su origen humilde y su conexion profundo cu e isla di Aruba.

Desde chikito, Ricardo su curiosidad tabata sin limite. E tabata haci varios deporte, di baseball, futbol, zwemmen, basket. tennis, tae-kwondo y tambe a bay les di pinta, di drum y tabata den scouting. Pero su fascinacion cu historia a manifesta te mas laat. Semper el a haye historia interesante pero no por a pensa, cu awor su carera lo ta rond di esaki. “Na HAVO, mi tabatin Geschiedenis como un vak y eynan bo por bisa mi tabata obliga di gust’e paso mi mester slaag. Pero p’esey mi semper ta bisa, spera e inespera, awo mi trabou tin di haber cu historia y cultura y tambe mi proyecto cu monumenten fonds completamente enfoca riba historia.”

Por lesa mas di Ricardo su entrevista den nos edicion digital, tanto den Papiamento como na Ingles.